Loading…
Deputeti i LDK’së: Raporti i Bulliqit lë të hapur mundësinë për konflikt me Malin e Zi
  • 18/03/2018 | 23:14

...

Deputeti i LDK-së, Ramiz Kelmendi, Ligjin për demarkacionin e kufirit me Malin e Zi, e ka quajtur “mollë sherri për demokracinë dhe gjeneratat e ardhshme”.


Ai përmes një shkrimi në Facebook thotë se marrëveshja e vitit 2015 për demarkacionin ka nxitur konflikte të brendshme për tri vjet radhazi.

Ai ka thënë se duhet të ratifikohet ligj i cili avancon dhe fuqizon marrëdhëniet mes popujve dhe shteteve fqinje, e jo ligj i cili rehabiliton liderët politik dhe gabimet e tyre.

“Njëkohësisht, të pastrohen edhe nominimet – patriot dhe tradhtarë. Realiteti po tregon se Qeveria Mustafa kishte të drejtë”, ka thënë ai.

Për ish-deputetin nga AAK-ja e PDK-ja, tash në radhët e LDK-së, marrëveshja e vitit 2015 për demarkacionin me Malin e Zi, është një çështje që nxiti konflikte të brendshme për tre vite radhazi, duke protestuar në rrugë, në parlament dhe duke vënë Kosovën në faqet e para të gazetave prestigjioze botërore.

“Sot kemi këtë situatë në anën e Malit të Zi. Pra, kemi një marrëveshje të nënshkruar në Vjenë në vitin 2015 dhe kjo marrëveshje është ratifikuar në parlamentin malazez duke e marrë fuqinë ekzekutive. Në anën tjetër kemi marrëveshjen e pa ratifikuar, raportin e Bulliqit dhe e treta, kemi dokumentin e nënshkruar në mes të presidentit të Kosovës dhe atij të Malit të Zi e cila jep mundësi për përmirësim të gabimeve të mundshme nga ana e komisionit Meha, me mundësinë e prezantimit të dokumenteve shtesë, komisionit për demarkacion kurdo që ato gjenden (konstatohen).

Të gjitha dokumentet në anën tonë në raportin e Bulliqit nuk dokumentojnë dhe nuk mundësojnë zhvendosjen e kufirit në Çakorr dhe Kullë, porse, dokumenti i presidentëve, mundëson lëvizje teknike kompensive të sipërfaqeve të vogla tokësore (dhjetëra hektarë – pra jo 8 mijë hektarët) për interesa të qytetarëve që jetojnë në atë zonë. Ky dokument është identik sikur edhe marrëveshja që kryeministri Mustafa arriti ta bënte me kryeministrin e Malit të zi, konkretisht, që, nëse pengohet ndonjë rrugë fshati, rrugë tek burimi i ujit, ndarje e sipërfaqeve të tokës së fermerëve, e njëjta të kompensohet me sipërfaqe të njëjtë kudo, ne çdo vend, me marrëveshje. Ky ligj që përmban marrëveshjen për demarkacion, dokumenti i presidentëve dhe raporti i Bulliqit është ligj, i cili e lë të hapur mundësinë e konfliktit ndërshtetëror, është ligj që hap konflikte të brendshme politike në rastin e qeverisë demokratike, është ligj që dëmton interesat e brezave të ardhshme të qytetarëve tanë dhe me këtë, çdo herë ka mundësi edhe opozita e brendshme e edhe armiqtë e jashtëm të ngrejë implementimin e këtij ligji që është aprovuar nga parlamenti i Kosovës, (pra si një mollë sherri në mes)”, ka thënë Kelmendi.

Sipas tij, ky ligj menjëherë bëhet konfliktuoz, që në rastin e parë të implementimit, sepse në të nuk ceken kufijtë apo ndryshimi i tyre dhe secili komision që do të implementojë në terren, duhet ta ketë të qartë se a është kufiri në Çakorr dhe Kullë, apo sipas marrëveshjes së ratifikuar në Parlament.

“Mos të harrojmë se komisioni malazez ka marrëveshjen e ratifikuar dhe të nënshkruar dhe jo dokumentet përcjellëse të Bulliqit. Nisur nga ky realitet, lind edhe pyetja se; me këtë, a po dëshirohet të bartet çështja tek komisionet në nivelin e ultë ? Kjo nuk kalon tek qytetarët, meqë ata po shohin se pikat e kontrollit kufitarë janë në gjendjen e kaluar. Andaj, përse duhet tu bëhet ky obstruksion qytetarëve të Kosovës? Pse duhet tu lihet brezave të ardhshëm politik dhe qytetarëve tanë kjo mundësi e mosmarrëveshjes dhe konfliktit? Pse duhet të shpresojnë banorët e Rugovës dhe Kulles të presin pafundësisht kthimin e kufirit në Çakorr dhe Kullë”, ka thënë ai.

“Nga kjo konstatojmë se tani para deputetëve është një ligj konfliktuoz i cili pritet të raftifikohet, pra hapur t’u tregohet qytetarëve që ishte gabim i madh politik, sjellja e opozitës së kaluar në raport me këtë marrëveshje dhe të pranohen këto gabime sepse nuk është turp. Opozita e djeshme dhe një pjesë e sotme e saj, janë bazuar në fjalë të shumta dhe kundërshtime të ekspertëve inekzistent dhe gjelozë. Pra, është më mirë që këto tu thuhen qytetarëve tani, se sa të tentohet të binden ata (qytetarët) se kemi arritur ta kthejmë kufirin në Çakorr dhe Kullë. Nuk qëndron fakti për këtë dhe është mirë të pastrohen të gjitha parashtesat dhe prapashtesat e marrëveshjes së demarkacionit, dhe ajo të jetë e pastër e jo, konfliktuoze”.

Ai ka thënë se është mirë dhe e drejtë që të pastrohen edhe nominimet – patriot dhe tradhtarë – nga qytetarët të cilët padrejtësisht janë polarizuar për interesa politike.

“Nuk është mirë edhe për partitë politike demokratike të lejojnë këtë ligj më këso llojesh të dokumentave të cilat cenojnë funksionimin e qeverive demokratike. Ne jemi dëshmitarë se sa shume qytetarë janë grumbulluar në protesta, duke rrezikuar edhe familjet dhe pasuritë e liderëve politik demoktratik. Andaj kjo çështje mos të vazhdoj të mbetet si “mollë sherri” për të ardhmen. Pra, e ripërsëris, duhet ratifikuar ligji i cili avanson dhe fuqizon marrëdhëniet mes popujve dhe shteteve fqinje, e jo ligji i cili rehabiliton liderët politik dhe gabimet e tyre”.

Më të fundit
Të tjera
Materialet në dispozicion në këtë faqe janë pronë e portalit Gazeta Metro. Ato janë të mbrojtura në bazë të së drejtës së autorit sipas ligjeve në fuqi. Ju mund të përdorni këtë faqe interneti, dhe materialet e kësaj faqeje, për përdorimin tuaj personal, jo-komercial, me kushtin që të mos cënoni të drejtën e autorit.
Kontakti:
Tel: +386 49 576 111
e-mail: info@gazetametro.net
marketing@gazetametro.net
Adresa: Rr. Tringë Smajli, Nr. 16
Prishtinë 10000
Kosovë