Loading…
Qeveria e Haradinajt me ngecje, rezultatet e ulëta dhe të pakënaqshme
  • 17/03/2018 | 21:25

...

Rezultatet e qeverisë Haradinaj janë të vogla dhe të pakënaqshme, thonë njohësit e zhvillimeve politike në vend. Sipas tyre, ekzekutivi i vendit ka dështuar për këta gjashtë muaj që të arrijë një konsensus nacional, në mënyrë që çështjet e rëndësishme t’i shtyjë përpara.

Ata thonë se mos përfundimi i çështjes së demarkacionit, po pengon edhe punën e Qeverisë.

Qeveria Haradinaj e nisi punën me premtime të mëdha dhe veprime të hovshme. Disa vendime qeveritare u tërhoqën apo u ndryshuan më pas  nga vetë kryeministri Haradinaj, kurse vendimi për rritjen e pagave për zyrtarët qeveritarë përfundoi në Gjykatën Kushtetuese.

Sidoqoftë, politologu Ramush Tahiri thotë se qeveria ngeci në çështjet politike dhe teknike.

“Ka mbet në pengesat kryesore që ka të bëjë me çështjet politike por edhe teknike siç është demarkacioni dhe themelimi i komunave me shumicë serbe dhe çështja e integrimeve serbe. Rezultatet duken të vogla dhe janë të pakënaqshme. Por, qeveria ka dështuar edhe në arritjen e një konsensusi në parlament por edhe një konsensusi nacional për t’i shtyrë çështjet përpara”, tha Tahiri, raporton RTK

Se çështja e demarkacionit, po e pengon qeverinë e vendit t’i kryejë detyrat e saj, e thotë edhe analisti Naim Rashiti.

“Qeveria filloi mbarë vitin e kaluar, mirëpo, sërish puna e qeverisë në institucione mbetet peng i marrëdhënieve politike dhe temave të mëdha, siç janë demarkacioni, Ligji për Gjykatën Speciale, procese të cilat shkaktuan shumë turbullira në vend dhe të cilat nuk po e lënë qeverinë të merret në mënyrë intensive që t’i kryejë punët e veta”, tha ai

Sipas Rashitit, nëse kjo çështje do të përfundonte, qeveria do të ishte më efektive në punët e saj.

Sidoqoftë, qeveria Haradinaj u kritikua edhe  nga shoqëria civile për mënyrën e shpenzimit të parasë publike.

Kabineti qeveritar për 4 muajt e parë ka ndarë rreth 4 milionë euro nga kategoria e shpenzimeve të paparashikuara.

Të tjera
Materialet në dispozicion në këtë faqe janë pronë e portalit Gazeta Metro. Ato janë të mbrojtura në bazë të së drejtës së autorit sipas ligjeve në fuqi. Ju mund të përdorni këtë faqe interneti, dhe materialet e kësaj faqeje, për përdorimin tuaj personal, jo-komercial, me kushtin që të mos cënoni të drejtën e autorit.
Kontakti:
Tel: +386 49 576 111
e-mail: info@gazetametro.net
marketing@gazetametro.net
Adresa: Rr. Tringë Smajli, Nr. 16
Prishtinë 10000
Kosovë