​Shkelet Ligji, mbi 50 profesorë me nga dy vende pune

Agjencia e Kosovës për Akreditim (AKA) ka deklaruar se ka evidentuar 53 profesorë, doktorë të shkencave, të cilët i kanë deklaruar nga dy vende të punës me orar të rregullt. Ndërkohë AKA ka evidentuar se shumë nga institucionet e arsimit të lartë në Kosovë, kanë deklaruar rrejshëm kuadro të ‘importuar’ nga Shqipëria e Maqedonia.

Drejtori i AKA-së, Blerim Rexha, i tha KosovaPress-it se ky verifikim ka ardhur pas deklarimeve të çdo viti në Agjenci, ku edhe thuhet se Ligji për Akreditim nuk lejon që një profesorë apo doktorë i shkencave t’i mbajë dy vende të rregullta të punës.“Procesi i deklarimit të stafit akademik të angazhuar në institucionet të arsimit të lartë është një proces standard, që Agjencia e Kosovës për Akreditim e zhvillon çdo vit, në kuadër të procesit normal të punës, e tani këtë vit më 15 nëntor ka përfunduar procesi i deklarimit të stafit. Ne kemi shikuar listat të cilat i kanë dorëzuar këto institucione të arsimit të lartë dhe jashtëzakonisht jemi të shqetësuar kur në këto lista kemi gjetur gati 53 doktorë shkence që i kanë deklaruar nga dy vende të punës të rregullt në Kosovë, aq më shumë jemi të shqetësuar kur një numër i madh i stafit akademik është importuar vetëm kinse formalisht nga Shqipëria, Maqedonia, dhe vendet tjera, të cilët pretendojnë të zhvillojnë marrëdhënie të rregullt të punës me orar të plotë në Kosovë”, ka thënë Rexha, shkruan KP.

Drejtori Blerim Rexha ka deklaruar se Agjencia që ai e drejton do t’i verifikoj edhe një herë nëse ka ndodh ndonjë gabim teknik, lëshim teknik gjatë bartjes së shënimeve, apo diçka tjetër, dhe ta sqaroj këtë me institucionet nga vijnë këta doktorë shkence.Mirëpo, nëse kontratat e punës figurojnë ashtu siç janë deklaruar, Rexha ka thënë se do të mbyllen disa programe të studimit.  Sa i përket mënyrës së deklarimit të profesorëve të cilët i kanë regjistruar nga dy vende të rregullta të punës, Rexha ka thënë se shumica e këtyre doktorëve të shkencave, fillimisht e kanë deklaruar vendin e rregullt të punës në institucione private të arsimit të lartë ndërsa herën e dytë e kanë deklaruar institucionin publik të të njëjtit nivel të arsimit.

Përderisa i pari i Agjencisë së Akreditimeve në vend, nuk mund të jap emra dhe të deklaroi për institucionet të cilat kanë shkelur Ligjet në fuqi, thotë se studentët që ndjekin këto degë që duket se do të dalin me probleme, nuk mund të pësojnë nga parregullsitë e institucioneve ku ata kanë vendosur të shkollohen.

Blerim Rexha tha se studentët të cilët janë regjistruar në këto programe të studimit, fakulteti e ka për obligim që t’ua organizojnë ligjëratat dhe provimet e mbetura, derisa studentët e rinj nuk do të mund t’i vazhdojnë studimet në programet prej të cilave vijnë këta studentë.Rexha ka thënë se Agjencia e Akreditimit po ashtu i ka obliguar institucione te arsimit të lartë që në faqet e tyre zyrtare në internet t’i paraqesin listat me të gjithë stafin e angazhuar në mënyrë që kjo të jetë publike dhe të mos shkelet ligji.