16 ditët kundër dhunës ndaj gruas

Me një varg aktivitetesh po shënohet sot në Prishtinë 25 Nëntori – Dita Ndërkombëtare për eliminimin e dhunës ndaj gruas.

Thirrje për ndalimin e dhunës bënë sot qindra njerëz përmes një marshi të organizuar nga Rrjeti i Grupit  të Grave të Kosovës.

Në kuadër të kësaj dite është zyra e kryeministrit e cila lanson raportin final për zbatimin e Planit të Veprimit për Rezolutën e Kombeve të Bashkuara 1325.

Kurse, organizuar nga Grupi i Grave Asambliste, Zyra për Barazi Gjinore dhe përkrahur nga kabineti i kryetarit të Komunës, Shpend Ahmeti, fillon aktiviteti “16 Ditët e aktivizimit kundër dhunës ndaj gruas”.

Në kuadër të këtij aktiviteti, nesër në ndërtesën e vjetër të Komunës së Prishtinës do të mbahet debat me temën “Dhuna, pasojat e saj dhe njohuritë ligjore”.

Sipas një njoftimi të Komunës së Prishtinës, në debat do të marrin pjesë përfaqësues të Policisë së Kosovës, Prokurorisë së Shtetit, Qendrës për Ndihmë Sociale, OJQ-së Women for Women etj.