48 mijë shqiptarë marrin shtetësi greke e italiane

Shqiptarët, sipas Eurostat-it, hyjnë në grupin e përfituesve më të mëdhenj të nënshtetësisë së një vendi evropian.

Duke marrë në shqyrtim të dhënat e para dy viteve, Agjensia Evropiane e Statistikave vëren në përgjithësi një rënie të numrit të personave që e kanë pasur këtë shans. Në vitin 2013 dokumentet në fjalë i kanë siguruar 980 mijë vetë, në vitin 2014 shifra ulet në 890 mijë e më pas, në vitin 2015 tkurret në 840 mijë të tillë.

Në 5 vjet, vëren Eurostat, totali i qytetarëve që kanë fituar nënshtetësinë e një vendi anëtar të bllokut evropian është mbi 5 milionë vetë. Përgjatë vitit 2015, që është dhe viti i shqyrtuar nga agjensia, pjesa dërrmuese e këtyre përfituesve, ose rreth 87 përqind e tyre ishin shtetas që nuk vinin nga vende të BE-së.

Në krye të listës së grupit të përfituesve për këtë periudhë kohore renditen marokenët. Mbi 86 mijë të tillë janë pajisur më së shumti me pasaporta italiane, spanjolle ose franceze.

Të dytët vijnë shqiptarët, me 48, 400 vetë. Në 96 përqind të rasteve tona mbizotërojnë nënshtetësitë e marra në Itali e Greqi.

Shqiptarët kanë lënë pas turqit, që përfitojnë kryesisht nënshtetësinë gjermane, rumunët me atë italiane, pakistanezët që marrin më tepër nënshtetësinë britanike dhe algjerianët e orientuar drejt asaj franceze.

Nga anëtarët e bllokut, rezulton që nënshtetësinë e një shteti tjetër të Bashkimit Evropian ta kenë fituar më shumë rumunët dhe polakët.

Rregullat për tu bërë qytetar i BE-së kanë specifika sipas vendit, por përgjithësisht ajo që kërkohet më shumë është që personi të ketë jetuar aty të paktën 5 vjet, të ketë mësuar gjuhën ose në disa raste të ketë njohuri bazë, e të ketë të dhëna të pastra penale.