Balerini nigerian synon rekordin botëror, kërcen për 168 orë pa ndërprerje

Balerini nigerian Benjamin Daniel, i njohur me nofkën “Ben Dancer”, ka nisur një sfidë të pazakontë me synimin për të vendosur një rekord të ri botëror në kërcim.

33-vjeçari synon të qëndrojë duke kërcyer për 168 orë, ose shtatë ditë pa ndërprerje, duke kërkuar të tejkalojë rekordin prej 127 orësh të vendosur në vitin 2023 nga balerina indiane Srushti Sudhir Jagtap.

Sfida po zhvillohet në Freedom Park në Lagos, ku një numër i madh të rinjsh janë mbledhur për ta përkrahur balerinin gjatë performancës.

Gjatë maratonës së kërcimit, Ben Dancer po sjell stile dhe ritme të ndryshme muzikore, duke përfshirë Afrobeats, fuji, jazz dhe zouk. Performanca e tij ndërthur elemente të kulturës tradicionale nigeriane me tinguj modernë.

Megjithatë, Guinness World Records ende nuk ka konfirmuar nëse përpjekja do të certifikohet zyrtarisht si rekord botëror.

Nëse arrin ta përfundojë sfidën sipas planit, Benjamin Daniel mund të vendosë emrin e tij në historinë e rekordeve të kërcimit.