Borrell ‘i prerë’ ndaj Kosovës dhe Serbisë: Hiqni Njësitë Speciale dhe barrikadat nga pikat kufitare

Përfaqësuesi i Lartë i Bashkimit Evropian për Politikë të Jashtme dhe Siguri, Josep Borrell ka bërë thirrje që menjëherë të tërhiqen Njësitë Speciale dhe të hiqen barrikadat në rrugë afër pikave kufiare 1 dhe 31 në veri të Kosovës, shkruan Gazeta Metro.

Borrell e ka quajtur të papranueshëm çdo provokim të mëtejshëm të situatës ose veprime të njëanshme dhe të pakoordinuara.

“Unë vazhdoj të ndjek nga afër situatën në veri të Kosovës. Serbia dhe Kosova duhet të de-përshkallëzojnë pa kushte situatën në terren, duke tërhequr menjëherë njësitë speciale të policisë dhe duke çmontuar pengesat në rrugë. Çdo provokim i mëtejshëm ose veprime të njëanshme dhe të pakoordinuara janë të papranueshme”, thuhet në reagim.

Në reagimin e tij më tutje, Borrell thotë se Kosova dhe Serbia duhet të gjejnë zgjidhje për zbutjen e situatës dhe BE do t’i mbështesë këto përpjekje. Ai i ka bërë përgjegjës kryeministrin e Kosovës Albin Kurti dhe presidentin serb Aleksander Vucic për çdo rrezik për sigurinë dhe mirëqenien e komuniteteve lokale si Kosovë ashtu edhe në Serbi.

“Kosova dhe Serbia duhet të gjejnë zgjidhje për të zbutur situatën dhe për të rënë dakord për rrugën përpara. BE do t’i mbështesë në mënyrë aktive këto përpjekje. Udhëheqësit e Kosovës dhe të Serbisë janë plotësisht përgjegjës për çdo rrezik për sigurinë dhe mirëqenien e komuniteteve lokale si në Kosovë ashtu edhe në Serbi. E theksova këtë në thirrjet e mia me presidentin Vucic dhe kryeministrin Kurti këtë javë”, thuhet në reagim.

Borrell në këtë reagim thekson rolin e dialogut për adresimin e çështjeve të hapura midis palëve, përfshirë targat dhe lirinë e lëvizjes dhe i ka ftuar palët ta përdorin këtë adresë.

Gjithashtu thuhet se presin nga Kosova e Serbia të kthehen në nxitjen e një mjedisi të favorshëm për pajtim, stabilitet rajonal dhe bashkëpunim më të mirë.

Ai ka thënë se është në kontakt të vazhdueshëm me Sekretarin e Përgjithshëm të NATO’s të cilin e ka falënderuar për bashkëpunimin e shkëlqyer mes KFOR’it dhe EULEX’it.

“Dialogu i lehtësuar nga BE’ja vazhdon të jetë platforma e vetme për të adresuar dhe zgjidhur të gjitha çështjet e hapura midis palëve, përfshirë ato që lidhen me lirinë e lëvizjes dhe targat dhe unë i nxis fuqimisht Kosovën dhe Serbinë që ta përdorin atë. Të dy kryenegociatorët që vijnë në Bruksel ditët në vijim është hapi i parë pozitiv. Është thelbësore që ata të vijnë me mandat për të diskutuar rrugën përpara dhe për të gjetur zgjidhje të qëndrueshme që janë në interes të qytetarëve. Ne e përsërisim që ne presim që Kosova dhe Serbia të kthehen në nxitjen e një mjedisi të favorshëm për pajtimin, stabilitetin rajonal dhe bashkëpunimin në të mirë të qytetarëve të tyre. Kjo është thelbësore për arritjen e një marrëveshjeje gjithëpërfshirëse dhe ligjërisht detyruese për normalizimin e marrëdhënieve të tyre, e cila është e nevojshme që të dy të përparojnë në rrugët e tyre përkatëse evropiane. Unë jam në kontakt të ngushtë me Sekretarin e Përgjithshëm të NATO -s, të cilin e falënderoj për bashkëpunimin e shkëlqyer mes KFOR -it dhe EULEX -it. KFOR luan një rol kyç në mbështetjen e stabilitetit rajonal në Ballkanin Perëndimor.”, thuhet në reagim. /gazetametro.net