Britaniku thyen rekord me hudhrën gjigante, peshon sa katër topa futbolli

Kopshtari britanik Graham Barratt ka hyrë sërish në librin e rekordeve, pasi kultivoi një hudhër elefanti me peshë prej 1.75 kilogramësh, duke vendosur një rekord të ri botëror.

Ekzemplari rekord u vlerësua më 25 qershor në Wargrave Plant Centre në Berkshire dhe kishte një diametër prej 19 centimetrash. Përmasat e saj janë rreth 35 herë më të mëdha se ato të një hudhre të zakonshme që gjendet në treg.

Bëhet fjalë për hudhrën elefanti (Allium ampeloprasum), një specie e afërt me preshin, e njohur për bulbet shumë më të mëdha se hudhra tradicionale. Megjithatë, edhe krahasuar me llojin e saj, kjo hudhër konsiderohet e jashtëzakonshme, pasi është katër deri në pesë herë më e madhe se mesatarja.

Pesha e saj është e barabartë me rreth katër topa futbolli sipas standardeve të FIFA-s, ndërsa do të mjaftonte për t’i dhënë shije afro 1,400 porcioneve salcë bolonjeze.

Barratt ka bërë të ditur se merret me kultivimin e hudhrës elefanti prej gati dhjetë vitesh, ndërsa çdo sezon ka mbjellë thelpinjtë më të mëdhenj për të përmirësuar vazhdimisht rezultatet. Hudhra që theu rekordin ishte mbjellë në shtator të vitit 2025.