Bytyqi e AAK’së: VV synon kapjen e tri posteve kryesore, presidenti mund të zgjidhej më herët

Deputetja e Aleancës për Ardhmërinë e Kosovës (AAK), Albana Bytyqi, shprehi kritika ndaj zhvillimeve rreth zgjedhjes së presidentit, duke e fajësuar Lëvizjen Vetëvendosje për situatën e krijuar, përcjell Gazeta Metro.

Sipas saj, partia në pushtet ka synim të dominojë tri institucionet kryesore të shtetit. Ajo bëri të ditur se AAK kishte dalë me emrin e vet për këtë post, por mungesa e përkrahjes nga subjektet e tjera politike bëri që iniciativa të mos vazhdojë më tej.

Bytyqi theksoi se, në këto rrethana, çështja është konsideruar e mbyllur.

“Që nga dita e parë AAK iu kemi treguar qytetarëve që LVV e ka vetëm një qëllim, është kapja e tri pozitave të shtetit. Ajo që ne e kemi cek si parti dhe e kemi pasur kandidatin tonë për president ka qenë shumë normale dhe jo ligjore, mirëpo nuk kemi gjetur mbështetje te partitë tjera dhe kjo çështje është mbyll. Kur nuk ke mbështetje normal që është çështje e mbyllur”, ka deklaruar ajo.

Deputetja shtoi se mungesa e vullnetit politik ka ndikuar që procesi të zvarritet, duke vlerësuar se, nëse do të kishte gatishmëri, zgjedhja e presidentit do të ishte përfunduar që më herët./gazetametro.net