Dëmtohen karriget e kinemasë Cineplexx në Prishtinë (Foto)

Janë dëmtuar me mjete të forta ulëset në sallat e kinemasë më të re të hapur ditë më parë në Prishtinë, shkruan Gazeta Metro.

Kështu kanë bërë të ditur vet menaxhuesit e kinemasë, përmes një publikimi në rrjetin social Facebook, ku kanë bashkëngjitur edhe fotografi të cilat dëshmojnë për dëmin e shkaktuar.

“Siç mund ta shihni në këto fotografi, dikush i ka dëmtuar karriget tona me thikë gjatë periudhës së shfaqjes së filmave në kinema”, thuhet në publikimin e kinemasë.

Tutje, ata kanë shprehur keqardhje për këto veprime dhe kanë bërë të ditur se veprimet e tilla do të denoncohen në Policinë e Kosovës bashkë me pamjet nga kamerat e sigurisë, të vendosura nëpër sallat ku shfaqen filmat.

Siç shihet nga fotot, ulëset janë dëmtuar qëllimisht me mjete të forta.

Kinemaja Cineplexx është hapur ditë më parë në qytetin e Prishtinës. gazetametro.net