Deputeti i PDK’së mbështet nismën e NISMA’s për mocion ndaj Qeverisë

Pas deklarimit të NISMA-s për Kosovën se po planifikon të nis një mocion mosbesimi ndaj Qeverisë, është deklaruar edhe deputeti i parë nga pozita se do e përkrahë këtë nismë.

Deputeti i PDK-së, Shukri Buja në një prononcim për Indeksonline thotë se tashmë dihet qartë qëndrimi i tij publik për këtë Qeveri, prandaj ai është për t’i dhënë votën e mosbesimit.

“Dihet qëndrimi im publik për këtë Qeveri, do të thotë nuk jam përkrahës i kësaj Qeverie dhe jam për t’i dhënë votën e mosbesimit”, ka thënë Buja.

Ndërsa sa i përket qëndrimi të PDK-së, Buja thotë se ende nuk janë konsultuar.

“Ne si parti ende nuk kemi dëgjuar për këtë çështje, por besoj që do të konsultohemi në parti. Pra, ende nuk kemi ndonjë qëndrim”, ka shtuar ai.

Nisma për Kosovë ka bërë me dije se po planifikon të nisë mocion mosbesimi kundër Qeverisë.

Nisma thotë se përfundimisht ka ardhur koha që të niset iniciativa parlamentare për mocion mosbesimi ndaj Qeverisë aktuale.

Sipas këtij subjekti, tashmë është dëshmuar se qeveria aktuale ka dështuar në të gjitha planet.