Loading…
Doganës i mungon akreditimi: Vazhdon të kontrollojë cilësinë e derivateve
  • 10/08/2019 | 15:10

Doganës i mungon akreditimi: Vazhdon të kontrollojë cilësinë e derivateve

Laboratorit të Doganës së Kosovës qysh në fund të muajit prill i ka kaluar akreditimi, megjithatë ky laborator ka vazhduar që të bëjë testimin e naftës dhe derivateve të saj me qëllim të klasifikimit doganor të tyre, si dhe kontrollimin e cilësisë së karburantit.


Kjo po shihet si e jashtëligjshme, pasi që udhëzimi administrativ për cilësinë e karburanteve të lëngëta të naftës në nenin 20, pika 5 precizon se deklarata e konformitetit duhet të bazohet në raportin e testimit të karburantit të lëngët të naftës të bërë në laboratorin e akredituar.

Kompetencën për kontrollin e cilësisë së naftës laboratori i Doganës së Kosovës e ka marrë nga Ministria e Tregtisë dhe Industrisë në prill të vitit 2015, kur me këtë ministri ka udhëhequr ish-ministrja Hykmete Bajrami.

Nga kjo ministri kanë bërë të ditur se pas përfundimit të akreditimit më 29 prill të këtij viti, Dogana nuk ka dërguar kërkesë për riakreditim.

Ndërsa, zëdhënësi i Doganës së Kosovës Adriatik Stavileci, thotë për KosovaPress se janë në proces të riakreditimit.

Vazhdimi i kontrollimit të cilësisë së naftës pas skadimit të akreditimit është vepër penale thotë Jakup Gashi, pronar i laboratorit “Sierra-lab” i cili është i akredituar për kontrollin e cilësisë së naftës nga MTI dhe nga DPA e Republikës së Shqipërisë.

Ai thotë se edhe kontrollin që e bënë Dogana është një mashtrim, pasi që sipas tij Dogana ka qenë e akredituar vetëm për tri metoda, ndërsa me udhëzim administrativ kërkohen 19 metoda për kontrollin e naftës.

Përkundër që akreditimi i ka kaluar në muajin prill, Dogana e Kosovës ka shpallur tender për furnizim me pajisje për caktimin e numrit oktanik dhe cetanik.

Ky tender sipas Gashit është i paligjshëm dhe një mashtrim, pasi sipas tij Doganës nuk i duhen pajisje të tilla.

Për këtë ka një përgjigje zëdhënësi i Doganës së Kosovës, Adriatik Stavileci, i cili thotë se nuk është kompetencë e askujt që t’i tregojë Doganës së çfarë duhet të blejë e çka jo.

Stavileci ka potencuar se Dogana e Kosovës nuk ka zgjedhur që të jetë autoriteti kompetent për bërjen e analizave, por që i janë deleguar kompetencat nga MTI-ja.

Më të fundit
Të tjera
Materialet në dispozicion në këtë faqe janë pronë e portalit Gazeta Metro. Ato janë të mbrojtura në bazë të së drejtës së autorit sipas ligjeve në fuqi. Ju mund të përdorni këtë faqe interneti, dhe materialet e kësaj faqeje, për përdorimin tuaj personal, jo-komercial, me kushtin që të mos cënoni të drejtën e autorit.

Privacy Policy
Kontakti:
Tel: +386 49 576 111
e-mail: [email protected]
[email protected]
Adresa: Rr. Tringë Smajli, Nr. 16
Prishtinë 10000
Kosovë