Drenasi i kthehet Veselit

Në fillim e braktisën Partinë Demokratike të Kosovës në Drenas për të kandiduar si të pavarur, por tash po rikthehen sërish aty.

Pas tërheqjes së kandidaturës së Naim Bazajt, tash edhe Rrahim Elshani është rikthyer në subjektin e tij politik, nga i cili ishte larguar më herët.

“Partia Demokratike e Kosovës në garën për komunën e Drenasit është më e bashkuar se kurrë më parë. Ajo është një familje e madhe që diversitetin e brendshëm e konsideron pasuri e jo barrë. Unë dhe miku im Rrahim Elshani, jemi të bindur se gjërat që na bashkojnë brenda PDK-së janë më të shumta dhe më të rëndësishme se opinionet e ndryshme që mund të na dallojnë. Prandaj, Rrahimi ndoqi shembullin e bashkëpartiakut tonë tjetër, Naim Bazaj, dhe u dakordua se në këtë garë kandidatura e Ramiz Lladrovcit është alternativa më e duhur për Drenasin”, ka njoftuar Veseli.

Pasi Veseli kishte vendosur ish ambasadorin Ramiz Lladrovci kandidat për të parin e Drenasit, Naim Bazaj kishte dalë kundër PDK-së duke shpallë kandidaturën si kandidat i pavarur. Madje ai me bindje të thellë kishte deklaruar se do të dobësojë Partinë Demokratike me vota.

Pas takimit me kryetarin e PDK-së Kadri Veseli, gjatë ditës së enjtë, Bazaj ka hequr dorë nga kandidatura për kryetar të Drenasit, duke u rikthyer  në PDK, në përkrahje të Ramiz Lladrovcit.