E zbulon Qeveria: U planifikuan sulme ndaj liderëve politik

Qeveria e Kosovës  përmes një njoftimi për media ka bërë të ditur se institucionet përgjegjese të Republikës së Kosovës kanë zbuluar se janë planifikuar sulme ndaj liderëve institucional dhe politikë të Kosovës.

Ky njoftim i Qeverisë vjen pas mbledhjes së këshillit për siguri të Kosovës, e që fillimisht nuk u bë e ditur arsyeja e këtij takimi.

“Pas shqetësimeve të ngritura në opinionin publik, Këshilli për Siguri i Kosovës informon qytetarët e vendit se institucionet përgjegjëse të Republikës së Kosovës kanë zbuluar veprime të disa individëve dhe grupeve të tyre, të lidhura me grupe dhe individë nga vende tjera jashtë Kosovës, të orientuara për destabilizimin e Kosovës dhe për rrezikimin e rendit kushtetues”, thuhet në njoftim.

Personat që kanë planifikuar këto sulme, sipas Këshillit për Siguri të Kosovës, kanë të kaluar të dyshimt dhe punojnë me shërbime të vendeve të huaja.

“Grupe të tilla kanë planifikuar të kryejnë akte kundër disa liderëve institucionalë dhe politikë të Kosovës. Veprimet e tilla, vlerësohet se mund të jenë të lidhura me njerëz me të kaluar të dyshimtë, që punojnë me grupe dhe shërbime të disa vendeve dhe mund të kenë lidhje me persona të inkriminuar në konflikte jashtë Kosovës, si dhe me vende të caktuara të cilat synojnë destabilizimin e Kosovës”.

“Institucionet e Kosovës po ndërmarrin të gjitha veprimet për ruajtjen e rendit kushtetues, për sigurinë dhe mbrojtjen e jetës së liderëve shtetërorë dhe politikë dhe të njerëzve të tjerë të rrezikuar nga grupe të tilla kriminale. Këshilli për Siguri i Kosovës konsideron se synimet dhe aktet e tilla duhet të dënohen nga të gjithë qytetarët e Kosovës, nga Qeveria, Parlamenti dhe shoqëria civile”.

“Ndërkaq, organet e rendit dhe ato të drejtësisë do të ndërmarrin të gjitha masat ligjore për të parandaluar akte që rrezikojnë jetën e njerëzve, stabilitetin e vendit dhe rendin kushtetues dhe që bartësit e grupet e tilla të sillen para drejtësisë”, thuhet në njoftimin e Qeverisë./gazetametro.net