Loading…

Ekonomia e Eurozonës ra edhe në shtator, Gjermania më së keqi

  • 23/09/2022 | 19:40

Ekonomia e Eurozonës ra edhe në shtator, Gjermania më së keqi

Aktiviteti i biznesit në eurozonë ra sërish në shtator, për të tretin muaj radhazi, në një mjedis presionesh gjithnjë e më të theksuara çmimesh mbi ekonominë dhe standardin e qytetarëve, tregoi të premten raporti mujor i S&P Global, transmeton Gazeta Metro.

Indeksi i menaxhimit të blerjeve (PMI) në sektorin privat të eurozonës ra në shtator për 0,7 pikë krahasuar me gushtin, në 48,2 pikë dhe është në nivelin më të ulët në 20 muaj.

Vlerat e indeksit janë më të ulëta se 50 pikë tregojnë një rënie të aktivitetit.

Kur përjashtohen shifrat nga periudha kur aktivitetet u pezulluan për shkak të kufizimeve të rrepta pandemike, dobësimi i PMI në shtator është më i madhi që nga viti 2013, thekson S&P Global.

Një recesion në eurozonë është shumë i mundshëm

Rënia u thellua në sektorët e prodhimit dhe të shërbimeve, si dhe kërkesa u dobësua për të tretin muaj radhazi, nën presionin e kostove të larta të jetesës dhe pesimizmit gjithnjë e më të theksuar.

Më e vështira është në Gjermani, PMI e së cilës në shtator ishte në nivelin më të ulët që nga maji 2020, me rënien më të madhe të aktivitetit në sektorin e shërbimeve në pak më shumë se 13 vjet.

Aktiviteti në industri, “gjaku i ekonomisë gjermane”, ra gjithashtu, megjithëse disi më i butë se në gusht, falë lehtësimit të ndërprerjeve në zinxhirët e furnizimit, thuhet në raport, shkruan AJB.

Në nivel të Eurozonës, rritja e mprehtë e çmimeve të energjisë rriti më tej kostot e kompanive dhe në disa raste e kufizoi prodhimin, ndaj indekset që tregojnë lëvizjen e çmimeve sinjalizojnë një intensifikim të përsëritur të presioneve inflacioniste.

“Një recesion në eurozonë ka shumë të ngjarë, pasi kompanitë raportojnë përkeqësim të kushteve të biznesit dhe forcimin e presioneve të çmimeve të lidhura me një rritje të mprehtë të kostove të energjisë,” tha Chris Ëilliamson, kryeekonomist i biznesit në S&P Global Market Intelligence.

Përkeqësimi më i madh në Gjermani

“Vlerësimi i parë i PMI tregon për një tkurrje prej 0.1 për qind në ekonomi në tremujorin e tretë,” shtoi Williamson.

Punësimi u rrit me të njëjtin ritëm si në gusht, kur rritja ishte më e dobëta në 17 muaj, gjë që, sipas S&P Global, pasqyron kufizimin në rritje të punëdhënësve në punësimin.

Në kushte të tilla, pritshmëritë e drejtuesve të biznesit për dymbëdhjetë muajt e ardhshëm janë përkeqësuar ndjeshëm, duke rënë në nivelin më të ulët që nga maji 2020. Kur përjashtohet periudha e pandemisë, ajo është në nivelin më të ulët që nga nëntori 2012.

Deri tani përkeqësimi më i madh u regjistrua në Gjermani, ndërsa në Francë pritjet u përmirësuan pak, tregon raporti./gazetametro.net

 

 

Të tjera
Materialet në dispozicion në këtë faqe janë pronë e portalit Gazeta Metro. Ato janë të mbrojtura në bazë të së drejtës së autorit sipas ligjeve në fuqi. Ju mund të përdorni këtë faqe interneti, dhe materialet e kësaj faqeje, për përdorimin tuaj personal, jo-komercial, me kushtin që të mos cënoni të drejtën e autorit.

Privacy Policy
Kontakti:
Tel: +383 49 576 111
e-mail: [email protected]
[email protected]
Adresa: Rr. Tringë Smajli, Nr. 16
Prishtinë 10000
Kosovë