Epoka e socialistëve: Kosova blen 7 herë më shumë se sa shet, 720 milionë euro importe në muaj – deficiti rritet 6,8%

Kosova vazhdon të blejë shumëfish më tepër nga jashtë sesa arrin të shesë në tregjet ndërkombëtare. Në korrik, në kohën kur vendi drejtohet nga Qeveria Kurti, importet arritën në 720.5 milionë euro, ndërsa eksportet vetëm 104.8 milionë euro, shkruan Gazeta Metro.

---

Një tjetër muaj me një faturë të lartë importi e ka thelluar problemin e deficitit tregtar të Kosovës. Të dhënat për korrikun 2026 tregojnë se vendi vazhdon të ketë një varësi jashtëzakonisht të madhe nga mallrat e huaja, pavarësisht rritjes së eksporteve.

Gjatë korrikut, Kosova importoi mallra në vlerë prej 720.479 milionë eurosh, ndërsa eksportoi mallra në vlerë prej vetëm 104.784 milionë eurosh.

Kjo krijoi një deficit tregtar prej 615.695 milionë eurosh.

Për vetëm një muaj, nga Kosova dolën rreth 104.8 milionë euro në vlerë të mallrave të eksportuara, ndërsa për mallrat e blera nga jashtë u paguan rreth 720.5 milionë euro.

Importet ishin kështu gati 7 herë më të larta se eksportet.

“Të dhënat nga tregtia e jashtme e mallrave në Kosovë tregojnë për një deficit tregtar prej 6,8 % në muajin korrik 2026, në raport me periudhën e njëjtët të vitit 2025, gjegjësisht në vlerë prej 615,7 milionë euro, krahasuar me deficitin prej 576,4 milionë euro në vitin 2025. Eksporti mbulon importin me 14,5 %.”.

Situata është edhe më e theksuar kur krahasohet me vitin e kaluar. Në korrik 2025, Kosova kishte importuar 660.207 milionë euro, ndërsa në korrik të këtij viti importet u rritën në 720.479 milionë euro.

Vetëm brenda një viti, fatura mujore e importit është rritur për rreth 60.3 milionë euro, ose 9.1 për qind.

Në të njëjtën periudhë, eksportet u rritën nga 83.826 milionë euro në 104.784 milionë euro, ose për rreth 25 për qind.

Por, edhe pse eksportet u rritën më shpejt në përqindje, ato mbeten shumë larg vlerës së importeve. Për këtë arsye, deficiti tregtar nuk u ngushtua, por u zgjerua.

Nga 576.4 milionë euro sa ishte në korrik 2025, deficiti arriti në 615.7 milionë euro në korrik 2026, duke u rritur për 6.8 për qind, apo rreth 39.3 milionë euro.

 

Eksportet mbuluan vetëm 14.5 për qind të importeve.

Kjo do të thotë se për çdo 100 euro mallra që Kosova i shet jashtë vendit, nga jashtë blen rreth 687 euro mallra.

Nga po i blejmë mallrat? Gjermania, Turqia dhe Kina në krye

Një tjetër element që bie në sy është origjina e mallrave që hyjnë në Kosovë.

Nga 27 vendet e Bashkimit Evropian, Kosova importoi në korrik mallra në vlerë prej 303.414 milionë eurosh, që përbënin 42.1 për qind të të gjitha importeve.

Brenda BE-së, partneri më i madh i Kosovës për import është Gjermania, e cila përbën 12.8 për qind të importeve totale.

Në bazë të vlerës së përgjithshme të importeve, kjo përqindje përkthehet në rreth 92.2 milionë euro mallra të importuara nga Gjermania vetëm gjatë korrikut.

Pas Gjermanisë vjen Italia me 5.9 për qind, që përkthehet në rreth 42.5 milionë euro, ndërsa Polonia përbën 4.0 për qind, ose rreth 28.8 milionë euro.

Vetëm nga këto tri shtete të BE-së, Kosova bleu mallra në vlerë të përafërt prej 163.5 milionë eurosh gjatë një muaji.

Turqia dhe Kina, dy burime të importeve

Përveç vendeve të BE-së, një pjesë shumë e madhe e mallrave vjen nga shtetet jashtë BE-së dhe CEFTA-s.

Nga ky grup, importet arritën në 328.231 milionë euro, ose 45.6 për qind të importeve të përgjithshme.

Në krye të këtij grupi janë Turqia dhe Kina.

Turqia përbën 13.5 për qind të importeve totale të Kosovës, që në vlerë është rreth 97.3 milionë euro vetëm gjatë korrikut.

Kina përbën 13.3 për qind, që përkthehet në rreth 95.8 milionë euro.

Vetëm nga Turqia dhe Kina, Kosova ka importuar mallra me vlerë rreth 193 milionë euro gjatë një muaji.

Kjo i vendos këto dy shtete në mesin e burimeve më të mëdha të furnizimit të tregut kosovar.

Nëse krahasohen shifrat sipas vendeve, Turqia, Kina dhe Gjermania dallohen si tre prej partnerëve kryesorë të Kosovës për importe në korrik.

Vetëm nga këto tri shtete, bazuar në pjesëmarrjet e publikuara, vlera e importeve arrin në rreth 285 milionë euro.

Edeh nga rajoni blejmë dhjetëra milionë euro

Kosova nuk varet vetëm nga tregjet e mëdha evropiane dhe aziatike.

Nga vendet e CEFTA-s, në korrik u importuan mallra në vlerë prej 88.834 milionë eurosh, ose 12.3 për qind e importeve totale.

Partneri kryesor në këtë grup ishte Maqedonia e Veriut, me 4.9 për qind të importeve totale, që përkthehet në rreth 35.3 milionë euro.

Pas saj vjen Shqipëria, me 3.3 për qind, ose rreth 23.8 milionë euro, ndërsa Serbia përbën 3.0 për qind, apo rreth 21.6 milionë euro.

Kështu, vetëm nga këto tri vende të rajonit, importet e Kosovës në korrik arrijnë në rreth 80.7 milionë euro.

Pjesa më e madhe e faturës së importit lidhet me disa kategori kryesore të mallrave.

Në krye janë produktet minerale, me 15.7 për qind të importeve.

Pas tyre janë ushqimet e përgatitura, pijet dhe duhani, me 13.3 për qind.

Një pjesë shumë e madhe e importeve përbëhet edhe nga makineritë, pajisjet mekanike dhe elektrike, me 12.4 për qind, si dhe mjetet e transportit, me 11.5 për qind.

Ndërsa metalet bazë dhe artikujt prej tyre përbëjnë 9.4 për qind të importeve.

 

Eksportet rriten, por nuk e ndjekin ritmin e faturës së importit

Në anën tjetër, eksportet e Kosovës kanë shënuar rritje të ndjeshme.

Në korrik 2026, Kosova eksportoi 104.784 milionë euro, krahasuar me 83.826 milionë euro një vit më parë.

Rritja prej 25 për qind është pozitive, por madhësia absolute e eksporteve mbetet shumë e vogël krahasuar me importet.

Edhe struktura e eksporteve tregon se Kosova vazhdon të mbështetet në një numër relativisht të kufizuar kategorish.

Metalet bazë dhe artikujt prej tyre përbëjnë 27.8 për qind të eksporteve, ndërsa ushqimet e përgatitura, pijet dhe duhani 12.7 për qind.

Pas tyre janë plastika, goma dhe artikujt prej tyre, me 10.1 për qind, produktet minerale, me 9.5 për qind, dhe artikujt e ndryshëm të prodhuar, me 7.1 për qind.

Në korrik, Kosova eksportoi drejt CEFTA-s 50.255 milionë euro, ose 48 për qind të të gjitha eksporteve.

Partnerët kryesorë ishin Maqedonia e Veriut me 16.9 për qind, Shqipëria me 16.7 për qind, Serbia me 6.7 për qind dhe Mali i Zi me 5.1 për qind.

Ndërsa drejt BE-së u eksportuan 31.542 milionë euro, ose 30.1 për qind e eksporteve.

Bilanci i korrikut: 720 milionë euro blerje, 105 milionë euro shitje

720.5 milionë euro janë importet.

104.8 milionë euro janë eksportet.

615.7 milionë euro është deficiti tregtar.

14.5 për qind është mbulueshmëria e importeve me eksporte.

Ndërsa nga ana e partnerëve, në krye të listës së furnizuesve dallohen Turqia me 13.5 për qind, Kina me 13.3 për qind dhe Gjermania me 12.8 për qind.

Vetëm këto tri vende përbëjnë rreth 39.6 për qind të importeve totale të Kosovës dhe, sipas vlerës së përgjithshme të importeve, përfaqësojnë rreth 285 milionë euro mallra të blera vetëm gjatë korrikut./gazetamentro.net