Familjes Dehari i lejohet të propozojë ekspertë për autopsi

Ministria e Drejtësisë ka bërë të ditur se me vendim të Prokurorisë, se është lejuar përfshirja e ekspertit të kërkuar nga familjarët e të ndjerit Astrit Dehari, në cilësinë e vëzhguesit në procesin e autopsisë.

Kjo ministri përmes një njoftimi për media ka thënë se ekipi i mjekëve ligjorë mbetet në pritje të propozimit të emrit të ekspertit nga familjarët e të ndjerit, në mënyrë që të fillojë sa më parë autopsia dhe të sqarohen zyrtarisht shkaqet e vdekjes.

Tutje, përmes këtij reagimi, Ministria e Drejtësisë, thotë se kërkon nga të gjitha institucionet e përfshira, në veçanti Inspektorati i Ministrisë së Drejtësisë, që procesi të zhvillohet me transparencë të plotë dhe siguron familjarët dhe opinionin se do të ndërmarr të gjitha masat që janë në mandatin e Ministrisë për të siguruar transparencë në këtë proces.

Gjithashtu, deri në marrjen e raportit zyrtar, Ministria e Drejtësisë thotë se mbështet mjekët ligjorë për fillimin sa më të shpejtë të obduksionit në përbërjen e kërkuar nga familja e të ndjerit dhe fton të gjithë qytetarët dhe partitë politike që të përmbahen nga paragjykimet lidhur me rastin.