Fluks kosovarësh për në bregdetin e Shqipërisë, në kufi kolonë 2 kilometra

Në këto ditë të nxehta gushti, shtetasit kosovarë po i drejtohen bregdetit shqiptar. Edhe në fillimin e kësaj jave, në orët e para të mëngjesit të sotëm, fluksi i pushuesve nga Kosova drejt Shqipërisë raportohet të ketë qenë shumë i lartë. 

Bëhet e ditur se kishte kolonë 1500-2000 metra në vendkalimin kryesor në autostradën e kombit, në Vërmicë-Morinë, por kalohej pa pritje të gjata, për 5-10 minuta.

Qendra Kombëtare për Menaxhimin Kufitar njofton se në dy vendkalimet e tjera, në Qafë të Prushit kalohej për 2-3 minuta dhe në Qafë të Morinës për 1-2.

Gjithashtu  kujtojmë se kolona të gjata nga Kosova drejt bregdetit shqiptar kishte edhe javën e kaluar.

Sipas Institutit Hidrometeorologjik, në Kosovë këtë javë do mbajë mot me diell dhe pjesërisht i vranët, temperaturat maksimale të ditës parashikohet të lëvizin ndërmjet 28 e 36 gradë celsius.