Francezët fillojnë votimin për President, Macron favorit

Pas një fushate të potershme zgjedhore të mbushur me skandale dh befasi, qytetarët francezë kanë filluar sot të votojnë për të vendosur nëse një kandidat i qendrës pro-Bashkimit Evropian, apo një djathtiste ekstreme kundër emigracionit do t’i udhëheqë ata në pesë vitet e ardhshme.

Sondazhet tregojnë se francezët do të zgjedhin Emmanuel Macronin, një 39-vjeçar ish ministër i Ekonomisë që dëshiron të ndërtojë urë lidhëse në mes të djathtistëve dhe majtistëve të ndarë, duke i bërë qëndresë një rryme kundër establishmetit që i pa britanikët të votonin për të dalë nga BE-ja dhe amerikanët për ta zgjedhur Donald Trumpin president, transmeton Express.

Por, nëse ndodh ndonjë befasi dhe fiton kandidatja e Frontit Nacional Marine Le Pen, atëherë e ardhmja e BE-së mund të jetë në rrezik.

Macron, i cili dëshiron që t’i heqë rregulloret dhe përkufizimet e ekonomisë dhe ta thellojë integrimin e BE-së, ka një epërsi prej 23 deri 26 për qind ndaj Le Penit në sondazhet publike.

Parashikimet dhe sondazhet kanë qenë të sakta për rundin e parë të zgjedhjeve presidenciale muajin e kaluar, të cilat parashikuan se Macron do ta fitonte rundin e parë dhe Le Pen do të dilte e dyta, siç edhe ndodhi.