Gjermania kërkon ndaljen e bojkotit të opozitës

Ministri i Jashtëm gjerman, Sigmar Gabriel, ishte i prerë dhe i qartë të hënën në Tiranë kur tha se askush në Evropë nuk po e kupton kërkesën e opozitës shqiptare për qeveri teknike, vetëm pak javë para mbajtjes së zgjedhjeve të përcaktuara politike.

Shefi i diplomacisë gjermane u shpreh kundër bojkotit dhe kërkoi zbatimin sa më parë të reformës në drejtësi.

Gabriel, që është edhe zëvendëskancelar i Gjermanisë, ka saktësuar se ky nuk ishte opinion i tij personal, por është ai i qeverisë federale së bashku dhe i kancerales gjermane Merkel që përfaqëson CDU-CSU në Gjermani.

Diplomati gjerman, Gabriel, dhe homologu i tij holandez, Bert Koenders, që gjithashtu pati takime të hënën në Tiranë, apeluan palët që të ulen në dialog.

Ministri i Jashtëm i Gjermanisë ka këshilluar opozitën në Shqipëri që me urgjencë të ndërpresë bojkotin e parlamentit në mënyrë që të shkohet në zgjedhje të lira e të ndershme. Sipas ministrit Gabriel, nëse zgjedhjet bojkotohen apo nëse vendi kësisoj kalon në një situatë kaotike, sigurisht për këtë nuk mund të kemi mirëkuptim dhe nuk mund t’ju ofrojmë mbështetje.