Hill thotë se Serbia tashmë ka vendosur të kthehet në Perëndim

Ambasadori i ShBA-së në Serbi, Christopher Hill tha sot se është e rëndësishme që pala serbe t’i qaset në mënyrë konstruktive planit të marrëveshjes evropiane me Kosovën, e cila thotë ai, në fund të fundit do të ndikojë në shpejtësinë me të cilën Serbia i afrohet Perëndimit. Ndërsa ka thënë se Serbia ka vendosur tashmë të kthehet në Perëndim.

---

Hill tha për TV N1 se “Serbia tashmë ka vendosur të kthehet në Perëndim”, duke shtuar se është zhgënjyese për shumë serbë që procesi po zgjat kaq shumë.

“Shpresoj se rezultati i gjithë kësaj do të jetë një ritëm shumë më i mirë dhe më i shpejtë i integrimit evropian”, tha Hill.

I pyetur se pse propozimi evropian është sekret, ai tha se nuk do ta quante sekret, por diçka që bie në kanalet tradicionale diplomatike.

“Nëse përpiqeni të merreni me diplomaci përmes mediave, do të ketë shumë keqkuptime”, tha ai dhe tha se për këtë arsye mendon se çështje të tilla duhet të diskutohen ekskluzivisht në tavolinë.

I pyetur nëse presidenti serb Aleksandar Vuçiq do të “kapërcejë kufirin” nëse zbulon përmbajtjen e propozimit në seancën e ardhshme serbe parlamentare, ai u përgjigj se ishte një “pyetje hipotetike”, por se ishte i nevojshëm një debat i madh në parlament.

“Mendoj se është me vend që plani të diskutohet në kuvend, por ua lë të tjerëve të vendosin se çfarë duhet të zbulohet dhe çfarë nuk duhet të zbulohet”, tha Hill.

“Çështja e marrëdhënieve të Serbisë me Rusinë – e shihni se ajo po dobësohet dita ditës. Mund të shihet se ka një interes në rritje për bashkëpunim me BE-në dhe më shumë interes për bashkëpunim me SHBA-në”, tha Hill.

Ai përsëriti qëndrimin e qeverisë amerikane se Serbia duhet t’i bashkohet sanksioneve kundër Rusisë, por shtoi se nuk është e vërtetë që as Serbia nuk ka bërë asgjë, sepse dënon agresionin rus ndaj Ukrainës.

I pyetur nëse pozita e Beogradit në negociatat me Prishtinën është më e dobët për shkak se nuk ka vendosur sanksione ndaj Rusisë, ai tha se këto janë çështje të veçanta.

E pyetur se kush bashkëpunon më shumë, kryeministri i Kosovës Albin Kurti apo presidenti serb Aleksandar Vuçiq, Hill u përgjigj duke buzëqeshur: “Nëse do të mendoja se përgjigjja e kësaj pyetje do të ndihmonte procesin e negociatave, do të përgjigjesha, por këtë do t’ia lë në imagjinatën tuaj”.

Ai gjithashtu theksoi se çështja kryesore për përmbushjen e Marrëveshjes së Brukselit është themelimi i Asociacionit të Komunave me Shumicë serbe.

“Unë mendoj se ka një nevojë urgjente që të gjithë të bien dakord për këtë dhe të kuptojnë se pasi të angazhoheni për diçka, duhet ta ndiqni,” tha Hill.

Ambasadori nuk ka dashur të komentojë dokumentet që kanë “rrjedhur” në media, por ka theksuar se qëndrimi i negociatorëve ndërkombëtarë është “i komunikuar shumë mirë si në Beograd ashtu edhe në Prishtinë”.