Irani godet një cisternë nafte amerikane pranë Ngushticës së Hormuzit para Samitit të NATO’s

Një cisternë nafte u përfshi nga flakët pasi u godit nga një predhë nga regjimi terrorist i Iranit, pranë brigjeve të Omanit, afër Ngushticës së Hormuzit, transmeton Gazeta Metro.

Sipas Operacioneve Tregtare Detare të Mbretërisë së Bashkuar (UKMTO), incidenti ndodhi rreth tetë milje detare në lindje të Limah, Oman, ndërsa anija po lundronte drejt jugut. Predha goditi anën e majtë të cisternës, duke shkaktuar zjarr.

Autoritetet britanike njoftuan se nuk janë raportuar viktima apo dëme mjedisore, ndërsa u kanë bërë thirrje anijeve që lundrojnë në zonë të tregojnë kujdes deri në përfundimin e hetimeve.

Ndërkohë, media amerikane Axios raportoi, duke cituar dy zyrtarë amerikanë që folën në kushte anonimiteti, se Korpusi i Gardës Revolucionare Islamike (IRGC) i Iranit lëshoi të paktën dy raketa ndaj anijeve tregtare që kalonin nëpër Ngushticën e Hormuzit. Sipas raportit, një anije e dytë është goditur dhe ka pësuar dëme të konsiderueshme.

Nga ana tjetër, media shtetërore iraniane pretendoi se objektivi ishte një cisternë e Katarit, e cila po kalonte nëpër korridorin detar të Omanit me mbështetjen e Marinës amerikane, duke shtuar se anija kishte shpërfillur paralajmërimet e autoriteteve iraniane.

Trafiku i transportit detar rifilloi pasi Uashingtoni dhe Teherani nënshkruan një memorandum mirëkuptimi muajin e kaluar që synonte t’i jepte fund konfliktit dhe të rihapte rrugën ujore strategjike. Megjithatë, Irani ka pohuar se anijet nuk do të kthehen në sistemin e kalimit të pakufizuar para luftës dhe u ka udhëzuar anijeve të qëndrojnë brenda një korridori të autorizuar përgjatë vijës bregdetare të saj./gazetametro.net