Jetësohet memorandumi i pesë kryeqendrave shqiptare

Kryetari i Prishtinës, Shpend Ahmeti, ka njoftuar për memorandumin e parë që ka lidhur Unioni i Bashkive Shqiptare, i përbërë nga pesë shtete: Tirana, Prishtina, Tetova, Ulqini dhe Presheva.

Përmes një njoftimi në rrjetin social Facebook, i pari i Prishtinës thotë se kryetarët e pesë shteteve shqiptarëve u mblodhën për të hedhur themelet e një bashkëpunimi të fortë, efikas, të qëndrueshëm e afatgjatë mes kryeqendrave urbane të hapësirës ku jetojnë një e treta e popullsisë shqiptare të Rajonit.

Ai, në këtë njoftim ka rënditur disa prej arsyeve të nënshkrimit të këtij memorandumi.

“Me besim të palëkundur tek ndjenja e solidaritetit dhe vëllazërisë që ekziston mes shqiptarëve kudo ata ndodhen; Të vetëdijshëm që sfida më e madhe me të cilën përballen sot shqiptarët është sfida e progresit, zhvillimit dhe e një jetë më të mirë; Të ndërgjegjshëm për rëndësinë që ka suksesi i bashkëpunimit mes nesh për avancimin e kauzës së shqiptarëve në rajon; Me bindjen se duke bashkuar forcat, duke mësuar nga përvojat e njëri tjetrit dhe duke mbështetur njëri tjetrin, mund të garantojmë një cilësi më të mirë jetese për qytetarët tanë; Të vendosur për të kthyer këtë bashkëpunim të bazuar në praktikat e modelet më të mira evropiane, në një histori suksesi; Me shpresën që modeli që ne po krijojmë do të zgjerohet duke përfshirë çdo qendër të banuar nga shqiptarët”, janë arsyet që ka shkruar Ahmeti, transmeton gazetametro.net.

E prej gjithë kësaj janë vendosur edhe aktivitetet që do zhvillohen në kuadër të këtij bashkëpunimi.

Të krijojmë një platformë bashkëpunimi që do t’iu lejojë bashkive tona të intensifikojnë shkëmbimin e përvojave dhe ekspertizës në fushat e urbanistikës, inovacionit, mjedisit, kulturës dhe formave të reja të financimit;

Të ngremë një Grup të Përhershëm Koordinator që ka për detyrë të ndërmjetësojë në mënyrë të pandërprerë komunikimin dhe bashkëpunimin konkret mes bashkive tona për të gjitha fushat e parashikuara në memorandumin apo çdo fushë tjetër me interes; 

Të zhvillojmë shkëmbime të rregullta ekspertize, përvoje dhe projektesh që kanë rezultuar të suksesshme; 

Të zhvillojmë rregullisht programe të përbashkëta kulturore e artistike; 

Të bashkëpunojmë për thithjen e fondeve dhe projekteve rajonale dhe ndërkufitare; 

Të mbështesim njëri tjetrin me masa, asete, ekspertizë dhe personel në rast emergjencash;

Ahmeti shkruan tutje se ata janë të bindur se përmes kësaj platforme bashkëpunimi, duke krijuar një sinergji mes Bashkive të Tiranës, Prishtinës, Tetovës, Ulqinit dhe Preshevës, apo cilësdo bashki shqiptare në rajon që do të dëshirojë t´i bashkohet kësaj nisme, do të arrijnë të përdorin në mënyrë më efikase burimet tona njerëzore e financiare për të zgjidhur ato probleme që shqetësojnë realisht qytetarët tanë dhe do t´i japin një hov të madh zhvillimit të hapësirës shqiptare në rajon./gazetametro.net