Kadri Veseli zotohet për forcim të shtetit, para varreve në Rezallë

Rreth 90 civilë shqiptarë u vranë nga forcat serbe në këtë masakër më 5 prill 1999.

Në fjalën e tij para të pranishmëve, kryeparlamentari Veseli tha se kjo lëndinë është dëshmi se çfarë sakrificash të mëdha bëri populli shqiptar i Kosovës për të arritur lirinë.

“Armiku ishte i egër dhe nuk kursente askënd, as fëmijët, as gratë, as pleqtë, por edhe Ushtria Çlirimtare e Kosovës dhe populli i Kosovës në përgjithësi, ishte i vendosur të mos heq dorë, me asnjë çmim, nga ëndrra për liri”, tha Veseli në ceremoninë e përkujtimit të viktimave të kësaj masakre.

Veseli shtoi se ky fshat kishte një barrë të rëndë gjatë luftës çlirimtare, duke u bërë mburojë e gjallë e rrugës kryesore që shpinte në Shtabin e Përgjigjëm të Ushtrisë Çlirimtare në Likovc.

“Dhimbjet dhe vuajtjet ishin të mëdha, por ne ia dolëm. Ne çliruam Kosovën dhe e krijuam shtetin e pavarur dhe sovran. Ne do ta zhvillojmë ekonominë tonë. Në Kosovën e lirë do të ketë punë dhe perspektivë për të rinjtë e saj. Ne do ta fuqizojmë shtetin tonë”, tha Veseli.

“Ne do ta bëjmë Ushtrinë e Kosovës, për ta garantuar kufijtë e shtetit tonë dhe të ardhmen e fëmijëve tanë”, theksoi kryeparlamentari Veseli.

Ai tha se Rezalla, si e gjithë Kosova, përgjithmonë do të jenë të lira dhe të sigurta.

“Ky është amaneti i dëshmorëve tanë dhe këtë amanet do ta bartim me krenari kombëtare dhe përgjegjësi shtetërore”, theksoi Veseli.