Komisioni për matje të territorit raporton të premten para Qeverisë

Komisioni i Ekspertëve për Matjen e Territorit do të raportojë para Qeverisë për të gjeturat dhe raportin e tyre faktografik, për t’i hapur rrugë procedimit në Kuvend, javën që vjen.

Kryeministri Isa Mustafa dhe kabineti i tij qeveritar të premten në mbledhjen e Qeverisë së Kosovës të thirrur për në orën 17:00, do të pranojnë për shqyrtim raportin faktografik të të gjeturave të Komisionit të ekspertëve për Matjen e Territorit, raporton Gazeta Express.

I njëjti raport, bashkë me propozimet shtesë (në rast se ka) do t’u dorëzohet anëtarëve të Qeverisë për shqyrtim, për t’u hapur rrugë për ta proceduar në Kuvend Projektligjin për Demarkacionin me Malin e Zi në mbledhjen e ardhshme të Qeverisë, javën që vjen.

Kjo është pika më e rëndësishme e rendit të ditës për mbledhjen e 135-të të Qeverisë, e thirrur për ditën e fundit të punës për këtë javë.

Para kësaj pike, në rendin e ditës që e ka parë Gazeta Express, kryeministri Mustafa do të hapë mbledhjen, e më pas si pikë e fundit janë diskutime të ndryshme.