Konate drejt largimit nga Liverpool, dështojnë negociatat për vazhdim të kontratës

Mbrojtësi francez Ibrahima Konate është pranë ndarjes me Liverpoolin, pasi bisedimet për rinovimin e bashkëpunimit mes palëve nuk kanë prodhuar marrëveshje.

Sipas mediave britanike, klubi nga “Anfield” dhe futbollisti nuk kanë gjetur gjuhë të përbashkët për kontratën e re, duke bërë që largimi i tij në fund të sezonit të konsiderohet pothuajse i sigurt.

Qendërmbrojtësi iu bashkua skuadrës angleze në verën e vitit 2021 nga RB Leipzig dhe gjatë qëndrimit të tij u shndërrua në një prej figurave më të rëndësishme të repartit defensiv. Ai regjistroi 181 paraqitje në të gjitha kompeticionet, duke kontribuar edhe në sukseset e klubit në arenën vendore dhe ndërkombëtare.

Pas katër sezonesh me fanellën e “The Reds”, 27-vjeçari pritet të nisë një aventurë të re, ndërsa interesimi për të nuk mungon nga disa prej ekipeve më të njohura evropiane.