Kosova krijon kushte për investitorët

Pas vendimit të Gjykatës Kushtetuese të Kosovës, që hodhi poshtë ankesën e një grupi të deputetëve serbë të Kuvendit të Kosovës, të cilët e kundërshtuan Ligjin për investime strategjike, i njëjti pritet të hyjë në fuqi brenda 15 ditësh.

Presidenti Hashim Thaçi, dje e ka nënshkruar Ligjin për Investime Strategjike, i cili sipas tij tash do të krijojë kushte shumë më të mira për investitorë vendorë dhe ndërkombëtarë.

“Me këtë ligj i japim fund njëherë e përgjithmonë procedurave burokratike dhe për çdo projekt që merr statusin e investimit strategjik, tash investitorët brenda 15 ditëve të punës do ta marrin edhe vendimin lidhur me kërkesat e tyre për leje, licenca dhe autorizime ligjore”, ka thënë Thaçi.

“Për projekte strategjike, investitorëve do iu lejohet edhe shfrytëzimi i pasurive të paluajtshme shoqërore me kohëzgjatje maksimale deri në 99 vjet”, ka shkruar Thaçi në Facebook./gazetametro.net