Krasniqi për marrëveshjen e Ohrit: E pamjaftueshme, është rezultat i gabimeve të Kurtit

Memli Krasniqi, kryetar i Partisë Demokratike të Kosovës, gjatë ditës së sotme ka pritur në takim ambasadorin e Finlandës, Matti Nissinen, shkruan Gazeta Metro.

Krasniqi, në postimin e tij në Facebook, ka ritheksuar se marrëveshja e arritur në Ohër, për ta, është e pamjaftueshme,  meqë nuk është finale e as gjithëpërfshirëse dhe heq dorë nga njohja e ndërsjellë.

Ai ka shtuar se, kjo marrëveshje është rezultat i gabimeve të vazhdueshme të kryeministrit Kurti.

Postimi i plotë:

Sot, në selinë e Partisë Demokratike të Kosovës, kam pritur Ambasadorin e Finlandës në Kosovë, Matti Nissinen, të shoqëruar nga Jeeni Laakso nga Ministria e Punëve të Jashtme të Finlandës dhe Annina Peltonen nga Fondacioni për Paqe “Marti Ahtisaari” (CMI).

Bashkë diskutuam për zhvillimet e fundit në Kosovë dhe situtatën aktuale politike, pas pranimit të propozimit evropian nga Kryeministri Kurti në Bruksel dhe dakordimit për aneksin e zbatimit të tij në Ohër.

Për ne, kjo marrëveshje, e cila nuk është as finale e as gjithëpërfshirëse dhe që heq dorë nga njohja e ndërsjellë, është e pamjaftueshme dhe mundësi e humbur për të përmbyllur konfliktin e ngrirë prej dekadash me Serbinë.

Kjo marrëveshje, mbi të gjitha, është rezultat i gabimeve të vazhdueshme të Kryeministrit Kurti dhe nuk i arrin qëllimet tona shtetërore e qytetare.

Mysafirët i falënderova për vizitën dhe mbështetjen konstante që Finlanda ka dhënë për Republikën e Kosovës. /gazetametro.net