Kriza në veri, Kurti pret në takim sonte Escobarin dhe Lajcakun

Albin Kurti, kryeministër i Kosovës, sonte do të pres në takim të dërguarin e posaçëm të Shteteve të Bashkuara të Amerikës për  Ballkanin Perëndimor, Gabriel Escobar dhe përfaqësuesin special të Bashkimit Europian për dialogun Kosovë-Serbi, Miroslav Lajcak, shkruan Gazeta Metro.

Kështu është bërë e ditur nga Zyra e Kryeministrit, nga ku shtohet se takimi do të fillojë në orën 20:00, në ndërtesën e qeverisë.

“Kryeministri i Republikës së Kosovës, Albin Kurti, pret në takim Përfaqësuesin e Posaçëm të Bashkimit Evropian për Dialogun Kosovë-Serbi, Miroslav Lajçak dhe Zëvendës Ndihmës Sekretarin e Shteteve të Bashkuara për Çështje Evropiane dhe Euroaziatike dhe njëherësh të dërguarin e posaçëm të Shteteve të Bashkuara të Amerikës për Ballkanin Perëndimor, Gabriel Escobar. Takimi mbahet në orën 20:00 në ndërtesën e Qeverisë”, thuhet në njoftim.

Pos takimit me Kurtin, Escobar e Lajcak, pritet që gjatë ditës së nesërme do të zhvillojnë një takime dhe me presidenten Vjosa Osmani.

Vizita e Escobar dhe Lajcak, në Kosovë e Serbi, po ndodh pas tensioneve dhe trazirave që u krijuan në veri pas zgjedhjeve të kryetarëve të rinj të komunave veriore, zgjedhjen e të cilëve po e kundërshtojnë serbët.

Përndryshe, Escobar dhe Lajcak, së pari do të zhvillojnë një vizitë në Serbi sot, ku edhe atje do të takohen me krerët e shtetit.

Kujtojmë se, për krizën në veri të Kosovës, SHBA’të si përgjegjëse e kanë lënë qeverinë e Kosovës të udhëhequr nga Kurti. /gazetametro.net