Kryetari i Rahovecit nga PDK: Nuk falim tokë për viza (Video)

Kryetari i Komunës së Rahovecit, Idriz Vehapi, ka thënë se është i bindur që nuk ka politikan, e as qytetar të Kosovës, i cili do të pranonte të jepte tokë në këmbim të vizave e as për gjë tjetër.

Mirëpo, ai në një intervistë për Ekonomia Online, ka thënë se nëse Komisioni shtetëror për matjen e territorit e ka kryer punën si duhet, marrëveshja për demarkacionin duhet të ratifikohet.

“Jam i bindur që s’ka politikan as qytetar në Republikën e Kosovës që do të jetë pro dhënies së tokës, jo për viza, por për asgjë tjetër. Por, nëse Komisioni e ka kryer punën si duhet, pse mos me u ratifiku marrëveshja. Unë po ju them që nuk e di saktësisht, nuk jam as ekspert i asaj fushe, por njëkohësisht nuk jam as banor i zonës, dhe nuk e di se si është çështja saktësisht, mirëpo komisionet profesionale duhet ta kryejnë këtë punë”, ka thënë Vehapi.