Loading…

Kush janë dy ‘Harvardasit’, partia e të cilëve është themeluar vetëm në shtator, por që tanimë kanë ‘pushtuar’ Bullgarinë?

  • 17/11/2021 | 19:31

Kush janë dy ‘Harvardasit’, partia e të cilëve është themeluar vetëm në shtator, por që tanimë kanë ‘pushtuar’ Bullgarinë?

Ata janë dy sipërmarrës të shkolluar në SHBA. Partia e tyre politike ka filluar të funksionojë vetëm që nga shtatori dhe ata e kanë “pushtuar” Bullgarinë.


Të quajtur “Harvardasit” për shkak të vendit ku kanë studiuar për master, Kiril Petkov, 41 vjeç dhe 44-vjeçari Assen Vassilev tani janë në majë të pushtetit në një platformë të korrupsionit zero, në një vend që shihet gjerësisht si më i madhi i korruptuar në BE.

Sidoqoftë, siç shkruan bbc, përcjell Telegrafi, ata ishin figura publike të njohura përpara se të krijonin partinë e tyre “Ne vazhdojmë ndryshimin” më 19 shtator. Ata ishin ministra të ekonomisë dhe financave në qeverinë e përkohshme që ka drejtuar Bullgarinë që nga maji.

Tani ata kanë për detyrë të bëjnë koalicion me dy parti të tjera protestuese dhe socialistët e vjetër.

Kjo nuk do të jetë e lehtë, por bullgarët janë të lodhur nga gati 18 muaj trazira politike dhe dëshirojnë një qeveri të qëndrueshme.

Karizma si faktori kryesor

Politika në Bullgari sot është e ndarë midis partive të reja si ato të tyre dhe një garde të vjetër të prekur nga korrupsioni, që përplasen me njëra-tjetrën për të udhëhequr vendin. Votimi i së dielës ishte i treti këtë vit.

E para nga partitë e stilit të ri u shfaq në zgjedhjet e fundit në korrik, të udhëhequra nga ylli televiziv Slavi Trifunov, por ai nuk arriti të formonte një qeveri.

Tashmë ajo pjesë e elektoratit që kërkon ndryshim ia ka besuar atë detyrë “Harvardasve”.

“Faktori kryesor për mua është karizma”, tha për BBC konsulenti kundër korrupsionit Philip Gounev.

“Kiril Petkov ndoshta as që e dinte se e kishte atë. Është pothuajse si dashuria, një përbërës misterioz që nuk mund ta përkufizosh plotësisht”.

Një dobësi e partive protestuese të së kaluarës në Bullgari ka qenë se ato dominoheshin nga liberalët e djathtë nga Sofja.

Ajo që Kiril Petkov solli në garë, argumenton Gounev, ishte aftësia për t’u folur bullgarëve të zakonshëm me një mesazh populist, majtist dhe “për të dalë nga kutia liberale”.

“Ai dhe shoku dhe kandidati i tij, Assen Vasilev, përsëritën të njëjtin mesazh pa pushim gjatë fushatës. Ne do t’i rishpërndajmë paratë që njerëzit e këqij ju kanë vjedhur deri më tani”.

Kur në qeveri majin e kaluar, ata zbuluan se një bankë e lartë kishte “ndryshuar destinacionin e parave”, të destinuara për kompanitë e vogla dhe të mesme, për disa firma të mëdha.

Rivali i tyre kryesor, Boiko Borisov, një ish-truproje dhe zjarrfikës që ka drejtuar Bullgarinë me partinë e tij të qendrës së djathtë GERB për pjesën më të madhe të 12 viteve të fundit, e ka përshkruar veten si një njeri i thjeshtë, që qëndron në mbrojtje të njerëzve të thjeshtë.

Hungarezët vështrojnë ngritjen e ‘Harvardasve’

Tani bullgarët kanë votuar për ndryshim dhe receta e tyre po përcillet nga afër në të gjithë rajonin.

Një tjetër “shembull” populist, kryeministri hungarez Viktor Orban, i pëlqen të theksojë prejardhjen e tij të fshatit dhe pasionin për mishin e derrit të pjekur.

Në zgjedhjet e prillit të ardhshëm ai do të përballet me sfiduesin e opozitës Peter Marki-Zay, një specialist marketingu që ka punuar në Kanada dhe SHBA.

Kiril Petkov u kthye në Bullgari në vitin 2007. Kompania e tij ProViotics përdor një lloj bakteri të nxjerrë nga lulebora në suplementet e saj shëndetësore që shiten në mbarë botën.

Gruaja e tij kanadeze Linda drejton një kafene vegane të quajtur Amelie Sweet Shop në qendër të Sofjes.

Një postim i fundit në faqen e dyqanit në Facebook thotë: “Unë jam e fiksuar pas këtyre kifleve me djathë të vegjël pa gluten!”

Ëndrra e “luanit bullgar”

Puna për formimin e qeverisë tashmë ka filluar.

“Nuk do të jetë e lehtë, por ata kanë filluar në vendin e duhur, me reformën gjyqësore”, tha për BBC konsulenti i PR dhe reklamave Radoslav Bimbalov, përcjell Telegrafi.

“Ata kanë premtuar të largojnë kryeprokurorin. Ndoshta qeveria e tyre nuk do të mbijetojë më shumë se shtatë apo tetë muaj, por kjo do të jetë koha e mjaftueshme për të bindur publikun se ata kanë për qëllim të bëjnë punë”.

Petkov, i cili duket se do të jetë kryeministri i ardhshëm i Bullgarisë, kohët e fundit i tha një intervistuesi se ëndrra e tij ishte të lexonte një studim rasti pas 10 vitesh:

“[Nuk do të flitet për tigrat aziatikë apo tigrin irlandez, por për luanin bullgar”.

Por bullgarët mund të mos jenë të gatshëm të presin kaq gjatë. /Telegrafi/

Të tjera
Materialet në dispozicion në këtë faqe janë pronë e portalit Gazeta Metro. Ato janë të mbrojtura në bazë të së drejtës së autorit sipas ligjeve në fuqi. Ju mund të përdorni këtë faqe interneti, dhe materialet e kësaj faqeje, për përdorimin tuaj personal, jo-komercial, me kushtin që të mos cënoni të drejtën e autorit.

Privacy Policy
Kontakti:
Tel: +383 49 576 111
e-mail: [email protected]
[email protected]
Adresa: Rr. Tringë Smajli, Nr. 16
Prishtinë 10000
Kosovë