Kush janë fajtorët për gjendjen e keqe në arsim

Sot nxënësit kosovarë u radhitën gati të fundit për nga niveli i arsimit. Këtë e bëri Programi për Vlerësimin Ndërkombëtar të Nxënësve/Studentëve, meqë rast u konstatua se nxënësit kosovarë janë në vendin e 68-të nga 72 vende ku kryhet kjo matje, shkruan Gazeta Metro.

E, përgjegjësitë për këtë po i vishen gati të gjithëve, përfshirë edhe prindërit. Jusuf Thaçi, njohës i arsimit, ka thënë se për nivelin e arsimit në Kosovë përgjegjës janë të gjithë.

“Përgjegjës për këtë nivel të dobët të arsimit në Kosovë, që e konfirmoi PISA, janë të gjithë në Kosovë, institucionet qendrore, institucionet lokale, shoqëria, drejtorët, mësimdhënësit, prindërit”, ka thënë Thaçi për Gazetën Metro.

Ai gishtin e drejton për nga institucionet qëndrore dhe lokale por, sipas tij, pjesë të madhe të përgjegjësisë kanë udhëheqësit e shkollave dhe vet mësimdhënësit.

“Zyrtarisht gishtin duhet drejtuar institucioneve përgjegjëse qendrore dhe lokale që janë përgjegjësit kryesorë, por sigurisht që pjesë të madhe të përgjegjësisë mbajnë edhe udhëheqësit e shkollave dhe vet mësimdhënësit”, ka thënë ai.

Ndryshe, arsimin në Kosovë në këto 16 vite e kanë udhëhequr 5 ministra të ndryshëm. Në vitet para pavarësisë së Kosovës, me arsimin kanë udhëhequr ministrat e LDK-së, Rexhep Osmani dhe Agim Veliu. Ndërkaq, tre ministrat tjerë kanë ardhur nga radhët e PDK-së. I pari nga ta ishte Enver Hoxhaj, tash ministër i Punëve të Jashtme. Më pas, atë e pasuan bashkëpartiakët e tij, Ramë Buja dhe Arsim Bajrami, i cili edhe tani është ministër i Arsimit, Shkencës dhe Teknologjisë./Gazeta Metro/