Loading…

Lajçak e përmendi Kosovën vetëm dy sekonda në Forumin Diplomatik në Antalia

  • 19/06/2021 | 22:14

Lajçak e përmendi Kosovën vetëm dy sekonda në Forumin Diplomatik në Antalia

Ishte i ftuar si emisar i Bashkimit Evropian për dialogun Kosovë – Serbi e çështje tjera për Ballkanin Perëndimor, por në Forumin Diplomatik në Antalia, Mirosllav Lajçak foli vetëm në këtë cilësinë e dytë të tij.


Në panelin ku po diskutohej e ardhmja e Evropës, sllovaku Kosovën e përmendi vetëm në dy sekonda kur foli se ku qëndrojnë vendet e Ballkanit Perëndimor në raport me unionin. Përmendi faktin se Kosova ende nuk mund të lëvizë lirshëm.

Ky megjithatë Kosovën, bashkë me pesë shtetet e tjera të Ballkanit Perëndimor, e sheh medoemos si pjesë të Evropës.

“Ne nuk u larguam. Amerika u tërhoq dhe u kthye mbrapa, por ne gjithnjë kemi qenë këtu dhe çfarë dua të them është se nuk ka alternativë tjetër për BE-në veç ta ftojë rajonin t’i bashkohet BE-së dhe nuk shoh alternativë më të mirë as për ata, përveçse të bëhen pjesë e familjes evropiane”.

Lajçak e pranon se Evropa e ka humbur kredibilitetin e saj, por thotë se po punon për zgjidhje.

“Viti 2020 ka qenë viti i vetëm, për sa e mbaj mend të paktën, që asnjë nga gjashtë shtetet nuk ka arritur asnjë progres. Ne biseduam muajin që shkoi me Ministrin e Jashtëm të BE-së dhe gjithsecili në union po thotë se ne nuk mund të vazhdojmë më kështu, nuk po veprojmë si duhet dhe po e humbim kredibilitetin dhe po e venitim entuziazmin pro evropian në rajon dhe duhet ta ndryshojmë mënyrën, por po përpiqemi ta gjejmë se si”, tha i dërguari i BE-së për dialogun Kosovë – Serbi e çështje tjera për Ballkanin.

Në këtë panel të Forumit Diplomatik të Antalias mori pjesë edhe ish-kryeministri rumun, Viktor Ponta, i cili tha fjalë të rënda për Bashkimin Evropian.

“Është turp, është gabim i madh, më lini të jap shembuj shumë konkret. Unë isha shumë i lumtur kur vizitova Beogradin dhe Tiranën. Jam një nga të paktët persona në botë që e ka shok edhe Vuçiqin edhe Ramën dhe mendoj se ata janë liderë të shkëlqyeshëm në Ballkan, dhe unë u thashë që duhet të anëtarësoheni, por Evropa gjithnjë po i ndryshon kushtet”, tha ai ndër të tjera.

Lajçak konfirmoi se më 6 tetor vendet anëtare të unionit do të mblidhen me gjashtë vendet e Ballkanit Perëndimor në një samit të përbashkët në Slloveni, pasi ky shtet merr edhe kryesimin e BE-së për gjashtë muajt e ardhshëm.

Të tjera
Materialet në dispozicion në këtë faqe janë pronë e portalit Gazeta Metro. Ato janë të mbrojtura në bazë të së drejtës së autorit sipas ligjeve në fuqi. Ju mund të përdorni këtë faqe interneti, dhe materialet e kësaj faqeje, për përdorimin tuaj personal, jo-komercial, me kushtin që të mos cënoni të drejtën e autorit.

Privacy Policy
Kontakti:
Tel: +383 49 576 111
e-mail: [email protected]
[email protected]
Adresa: Rr. Tringë Smajli, Nr. 16
Prishtinë 10000
Kosovë