Lista Serbe nuk e njeh Mustafën për kryeministër

Lista Serbe i ka bojkotuar përsëri aktivitetet në institucionet e Kosovës, e kjo ka ardhur pas takimit që deputetët e kësaj partie kishin me kryeministrin serb, Aleksandar Vuciq.

“Ju njoftojmë se ne ligjvënësit serbë në institucionet e përkohshme të Kuvendit të Kosovës do t’i zbatojmë të gjitha vendimet e presidentit Vuçiq dhe se i ngrijmë të gjitha aktivitetet e punës në Kuvend dhe Qeveri”, njofton Lista Serbe.

Disa ditë pasi u rikthyen në institucione, serbët patën disa mosmarrëveshje, që erdhi pas shkarkimit të ministrit Mariq. Më pas një pjesë e Listës Serbe u kthye në institucione, e madje edhe një ministre e re erdhi në kabinetin e Isa Mustafës.

Por, ndarja e Listës Serbe nuk zgjati shumë. Pas takimit me kryeministrin serb, ata kanë thënë se kryeministër kanë Vuçiqin, duke njoftuar se ministrja Jevtiq tërhiqet nga posti i ministres.

‘Kryeministri Vuçiq është kryeministër i yni dhe jo Isa Mustafa, kështu ka qenë dhe kështu do të jetë’, thuhet në njoftimin e Listës Serbe.