Ben Affleck shet kompaninë e tij teknologjike në një marrëveshje me Netflix

Ben Affleck po vazhdon të zgjerojë aktivitetin e tij në industrinë e filmit, këtë herë duke u fokusuar te teknologjia dhe inovacioni. Aktori dhe regjisori ka shitur startup-in e tij teknologjik të bazuar në inteligjencë artificiale, InterPositive, te gjiganti i transmetimit Netflix.

Marrëveshja u bë publike më 5 mars dhe konsiderohet një hap i rëndësishëm për përdorimin e inteligjencës artificiale në procesin e prodhimit të filmave dhe serialeve. Sipas njoftimit të Netflix, kjo lëvizje synon të mbështesë inovacionin që vjen nga vetë krijuesit dhe të mbajë artistët në qendër të procesit krijues.

Pas marrëveshjes, Affleck do të marrë rolin e këshilltarit të lartë në projekt. Ndërkohë, ekipi i InterPositive, i përbërë nga rreth 16 inxhinierë, studiues dhe krijues, do t’i bashkohet Netflix për të zhvilluar teknologji që ndihmojnë në fazat e post-produksionit të projekteve filmike.

Aktori ka shpjeguar se ideja për krijimin e kompanisë lindi pasi ai vëzhgoi zhvillimin e shpejtë të inteligjencës artificiale në industrinë e filmit. Sipas tij, ishte e rëndësishme që këto mjete të ndërtoheshin në mënyrë që të mbështesin krijimtarinë njerëzore dhe jo ta zëvendësojnë atë.

InterPositive ka zhvilluar modele të inteligjencës artificiale të fokusuara në teknikat e realizimit të filmave, si ndriçimi, montazhi dhe elementë të tjerë teknikë, duke shmangur ndërhyrjen në performancat e aktorëve.

Ky zhvillim vjen gjithashtu pas bashkëpunimit të fundit të Affleck me mikun dhe kolegun e tij të hershëm, Matt Damon, në projektin filmik “The Rip”, një thriller aksion i publikuar në Netflix, që solli një model të ri shpërblimi për ekipin e produksionit.