Luvri nis projektin e rindërtimit miliarda euro, ‘Mona Lisa’ me sallë të veçantë

Muzeu i Luvrit në Paris ka nisur një plan të gjerë rindërtimi dhe zgjerimi, me një vlerë që mund të arrijë deri në 1 miliard euro. Projekti synon të përmirësojë qarkullimin e vizitorëve dhe të transformojë përvojën brenda muzeut më të vizituar në botë.

Sipas administratës, për realizimin e këtij projekti janë përzgjedhur dy studio arkitekturore nga Franca dhe Gjermania. Ndërhyrjet kryesore përfshijnë ndërtimin e një hyrjeje të re, me qëllim lehtësimin e mbingarkesës dhe rritjen e kapacitetit të vizitorëve me rreth tre milionë persona në vit.

Në kuadër të planit parashikohet edhe krijimi i një hapësire të dedikuar për veprën e famshme të Leonardo da Vinçit, “Mona Lisa”, e cila tërheq çdo ditë mijëra turistë nga e gjithë bota.

Sipas planit, muzeu pritet të rrisë kapacitetin me miliona vizitorë shtesë në vit, duke u mbështetur në dizajne moderne arkitekturore dhe zgjerim nëntokësor të hapësirave ekspozuese.

Megjithatë, projekti ka krijuar kritika për shkak të kostos së lartë dhe sfidave të fundit të muzeut, përfshirë incidente sigurie dhe probleme infrastrukturore.