Mbi 7 mijë nënshkrime janë mbledhur brenda dy ditësh

Peticioni për drejtësi në rastin e vdekjes së Astrit Deharit brenda dy ditwsh ka mbledhur plot 7218 nënshkrime.

Ndryshe nga këto dy ditë që nënshkrimet janë mbledhur vetëm në Prishtinë, te pikat Sheshi Zahir Pajaziti; Sheshi Nënë Tereza; Para Pallatit të Rinisë, NewBorn dhe përball rektoratit, nesër do të zgjerohet rrjeti, raporton koha.net

Shoqëria civile ka paralajmëruar që nënshkrimet do të zgjerohen edhe në dy qytete tjera: Gjakovë dhe Podujevë.

Në Gjakovë pikat kryesore janë: Parku i Qytetit; Sheshi Nënë Tereza dhe “Qarshia e Vogël”. Në Podujevë pika kryesore është sheshi i qytetit. Këto pika do të jenë të vendosura nga ora 11:00 deri në orën 17:00.

“Ndërsa, peticioni do të vazhdojë të përhapet edhe në komunat tjera të Kosovës deri sa të arrijmë shifrën e caktuar”, thuhet në komunikatën e grupit organizator. Shifra që organizatorët synojnë ta arrijnë është 10 mijë nënshkrime.

Nënshkrimet në peticion kërkohën me qëllim që të arrihen këto pika:

1. Hetim të pavarur dhe transparent për rastin
   2. Dorëheqjen e udhëheqësve të Ministrisë së Drejtësisë dhe Ministrisë së Punëve të Brendshme për mosgatishmërinë morale e ligjore për të kërkuar dhe dhënë përgjegjësi.
   3. Fillimin e menjëhershëm të ndjekjes penale të përgjegjësve që dështuan të garantojnë sigurinë e jetës së Astritit në institucionet e shtetit dhe shkarkimin e zyrtarëve përgjegjës në tërë zinxhirin hierarkik për mos trajtimin dinjitoz të Astritit në qendrën e paraburgimit edhe pas vdekjes së tij.
   4. Kryesia e Kuvendit të Kosovës në bazë të Nenit 38, paragrafit 1 të Rregullores së Punës së Kuvendit, të thërras mbledhje të jashtëzakonshme për rastin e Astrit Deharit. /gazetametro.net