Loading…

Më i shëndetshëm është lëngu i frutave apo vetë frutat?

  • 07/12/2021 | 14:02

Më i shëndetshëm është lëngu i frutave apo vetë frutat?

Ju mund të mendoni se duke qenë se lëngjet e frutave vijnë direkt nga frutat, atëherë duhet të jenë të barasvlefshëm me vetë frutat sa i përket vlerave ushqyese.


Mirëpo, në përgjithësi lëngu i frutave nuk është më i shëndetshëm se vetë frutat. Edhe nëse lëngu është i saposhtrydhur, pirja e lëngut është më pak e shëndetshme sesa ngrënia e vetë frutave. Ka dy arsye kryesore për këtë mospërputhje.

Së pari, tuli dhe lëkura e frutave që mbeten pas janë të pasura me fibra dietike. Fibrat dietike luajnë një rol më të rëndësishëm sesa thjesht rregullimi i sistemit tretës. Kur ju hani një frut të tërë, fibrat dietike në tul lidhet me sheqerin natyral në fruta dhe ‘qarkullojnë’ nëpër traktin tuaj gastrointestinal.

Ky veprim lidhës e bën më të vështirë dhe kërkon më shumë kohë që trupi juaj të thithë sheqerin. Si rezultat, sheqeri i frutave grumbullohet në gjakun tuaj me një ritëm më të ulët dhe më të ngadaltë nëse i hani frutat të plota sesa nëse pini drejtpërdrejt lëng frutash.

Ky proces lejon trupin tuaj të përdorë sheqerin më shumë si një burim direkt energjie. Në të kundërt, pirja e lëngjeve të frutave çon në një rritje të sheqerit në gjak. Duke ndjerë se keni më shumë sheqer sesa keni nevojë, trupi juaj lëshon shpejt insulinën, duke bërë që një sasi e madhe e sheqerit në gjakun tuaj të shndërrohet në yndyrë dhe glikogjen.

Në këtë mënyrë, rritja e sheqerit në gjak çon në një rënie të sheqerit në gjak (nëse nuk hahet më shumë ushqim), duke ju lënë përsëri të uritur. Dhe të qenit i uritur ju bën të hani më shumë. Në këtë mënyrë, pirja e lëngut të pastër të frutave çon në rregullim më të dobët të sheqerit në gjak dhe rritje të konsumit të kalorive, në krahasim me konsumimin e frutave.

Njerëzit të cilët janë veçanërisht të ndjeshëm ndaj niveleve të sheqerit në gjak mund të pësojnë edhe dhimbje koke, plogështi dhe nervozizëm pas pirjes së lëngut të frutave, ndërsa këto simptoma nuk shfaqen kur i hanë frutat të plota.

Fruti është më i shëndetëshëm sesa lëngu i tij. Public Domain Image, source: Christopher S. Baird.
Një studim i udhëhequr nga LF Burroughs i botuar në American Journal of Clinical Nutrition thotë:
“Një grup vullnetarësh të shëndetshëm hëngrën vakte ekuivalente me sheqer të portokallit dhe lëngut të portokallit dhe rrushit dhe lëngut të rrushit. Ngopja, e vlerësuar nga dy sisteme subjektive të vlerësimit, ishte më e madhe pas ngrënies së frutave të plota sesa pas pirjes së lëngut dhe kthimi i oreksit u vonua. Me portokallin, siç u raportua më parë me mollët, kishte një përgjigje dukshëm më të vogël të insulinës ndaj frutave sesa ndaj lëngut dhe më pak rënie postabsorbtive të glukozës në plazmë.”

Një studim tjetër i udhëhequr nga HH Stratton dhe i botuar në revistën
Pediatrics zbuloi se: “Midis fëmijëve që fillimisht ishin ose në rrezik për mbipeshë ose nënpeshë, rritja e marrjes së lëngjeve të frutave u shoqërua me shtim të tepërt të yndyrës, ndërsa të ushqyerit me fruta të plota u shoqërua me rritje të reduktuar të dhjamosjes.”

Së dyti, tuli dhe lëkura e shumë frutave priren të jenë të pasura me vitamina dhe lëndë të tjera ushqyese. Nxjerrja vetëm e lëngut lë pas shumë nga këto lëndë ushqyese. Për shembull, portokallet janë një burim i pasur flavonoidësh, por shumica e flavonoideve ruhen në tul dhe jo në lëng.

Prania e fibrave dietike dhe lëndëve të tjera ushqyese në lëkurën dhe pulpën e frutave i bën frutat dukshëm më të shëndetshëm se lëngu i frutave. Për shembull, një studim i drejtuar nga Qi Sun i Harvard Medical School dhe i botuar në British Medical Journal zbuloi se:

Duke zëvendësuar çdo tre porcione/javë të konsumit të lëngjeve të frutave me të njëjtën sasi frutash të plota ose individuale, rreziku i diabetit të tipit 2 në analizën e bashkuar ishte 7% (95% intervali i besimit 4% deri në 9%) më i ulët për frutat totale, 33% (24% deri 40%) më e ulët për boronicat, 19% (14% deri në 24%) më e ulët për rrushin dhe rrushin e thatë, 14% (11% deri 18%) më e ulët për mollët dhe dardhat, 13% (9% deri 16%) më e ulët për bananet dhe 12% (8% deri në 17%) më e ulët për grejpfrutin.

Për më tepër, ne zbuluam se zëvendësimi i lëngjeve të frutave me portokall, pjeshkë, kumbulla dhe kajsi shoqërohej gjithashtu me një rrezik më të ulët të diabetit të tipit 2: 18% (8% deri 28%) më pak për kumbullat e thata, 11% (5% deri në 16%). ) më e ulët për pjeshkët, kumbullat dhe kajsitë, dhe 8% (4% deri në 12%) më e ulët për portokallet.

Gjithsesi, pirja e lëngjeve 100% të frutave është sigurisht më e shëndetshme se pirja e pijeve të gazuara ose pijeve me shije frutash me ëmbëlsues artificialë, megjithatë, më e mira ndër këto është pirja e një gote ujë dhe ngrënia e një fruti të tërë të papërpunuar.

Marrë nga: Science Questions with Surprising Answers
Nga: Dr. Christopher S. Baird – profesor i Fizikës në West Texas A&M University.
Përkthyer nga: Shkendije Berisha

Të tjera
Materialet në dispozicion në këtë faqe janë pronë e portalit Gazeta Metro. Ato janë të mbrojtura në bazë të së drejtës së autorit sipas ligjeve në fuqi. Ju mund të përdorni këtë faqe interneti, dhe materialet e kësaj faqeje, për përdorimin tuaj personal, jo-komercial, me kushtin që të mos cënoni të drejtën e autorit.

Privacy Policy
Kontakti:
Tel: +383 49 576 111
e-mail: [email protected]
[email protected]
Adresa: Rr. Tringë Smajli, Nr. 16
Prishtinë 10000
Kosovë