Militantë majtistë protestuan, reagon kompania e investimit 4 miliardë euro në Zvërnec të Shqipërisë

Pas tensioneve të regjistruara sot në zonën e Dalanit në Zvërnec, ku aktivistë të mjedisit dhe përfaqësues të Lëvizjes Bashkë protestuan kundër ndërtimeve të planifikuara, ka reaguar kompania “Zvërnec South Adriatic Development”, e cila mbron projektin dhe e cilëson atë si një nga investimet më të mëdha turistike në rajonin e Mesdheut.

Në një deklaratë të gjatë publike, kompania shpreh “keqardhje të thellë” për atë që e konsideron abuzim me ndjenjat e publikut dhe përpjekje për të përbaltur projektin, duke theksuar se ka nisur vetëm fazën fillestare të investimit dhe se rrethimi i pronës është kryer në përputhje me legjislacionin shqiptar.

Sipas kompanisë, investimi pritet të kalojë vlerën e 4 miliardë eurove dhe të kontribuojë me 3 deri në 4 për qind në Prodhimin e Brendshëm Bruto të Shqipërisë gjatë pesë viteve të ardhshme. Gjithashtu, projekti parashikon krijimin e mbi 10 mijë vendeve të reja pune, direkt dhe indirekt, duke u paraqitur si një motor i ri zhvillimi për Vlorën dhe ekonominë shqiptare.

Kompania kundërshton akuzat e ngritura nga kundërshtarët e projektit, duke deklaruar se trualli ku do të zhvillohet investimi është pronë private e blerë nga pronarë të ligjshëm dhe se të gjitha transaksionet janë kryer përmes sistemit bankar. Sipas saj, çdo hap është ndjekur në përputhje me autorizimet ligjore dhe projekti po përgatitet nga studio ndërkombëtare të arkitekturës dhe mjedisit.

Një pjesë e rëndësishme e deklaratës i kushtohet edhe çështjes së mjedisit. Kompania pretendon se prej dy vitesh ka angazhuar ekspertë ndërkombëtarë për studimet mjedisore dhe garanton se biodiversiteti i zonës do të mbrohet. Ajo premton se projektet mjedisore dhe arkitekturore do të bëhen publike sapo të përfundojnë.

Në fund të reagimit, “Zvërnec South Adriatic Development” dënon çdo akt dhune ndaj pronës private, hedh poshtë akuzat për dezinformim dhe paralajmëron se do të ndjekë rrugë ligjore ndaj kujtdo që, sipas saj, tenton të pengojë ose shantazhojë investimin. Deklarata vjen në një moment kur debati për të ardhmen e Zvërnecit po bëhet gjithnjë e më i ashpër, mes atyre që e shohin projektin si një mundësi të jashtëzakonshme zhvillimi dhe atyre që paralajmërojnë pasoja të rënda për mjedisin.