Ministria e Integrimeve paguan 17.5 euro për një ombrellë
-
15/11/2016 | 09:14
Ministria e Integrimit Evropian ka shpenzuar 875 euro për të blerë 50 ombrella. Për një të tillë e cila do të mbajë edhe llogon e kësaj ministrie do të paguhen 17.5 euro.
Blerjen e këtyre ombrellave, sipas KALLXO.com, MIE e ka bërë përmes procedurës së mbyllur të prokurimit, pra pa njoftim për kontratë.
Në faqen zyrtare të Komisioni Rregullativ për Prokurim Publik (KRPP) është publikuar njoftimi për nënshkrimin e kontratës për tenderin “Furnizim me ombrella për nevoja të MIE-së”.
Por çmimi i një ombrelle në tregun e Kosovës ndryshon varësisht nga cilësia. Më e lira është 1,5 euro.
Zyra për Informim e Ministrisë së Integrimit Evropian për KALLXO.com thotë se 50 ombrella janë blerë me logo të këtij institucioni duke treguar në të njëjtën kohë edhe arsyen e blerjes së këtyre ombrellave.
“Ombrellat janë për qëllime përfaqësimi, si dhurata për personalitete të larta shtetërore që vizitojnë Kosovën dhe kanë takime protokollare me përfaqësuesit e MIE-së”, thuhet në përgjigjen e tyre.
