Muri nuk do të rrëzohet, por do të ridizajnohet siç e kërkon Brukseli

Muri ndërmjet Mitrovicës jugore e veriore nuk do të shembet, bazamenti i tij do të ridizajnohet në shkallë që do të lidhen me rrethrrotullimin që po ndërtohet në anën veriore, ka deklaruar prefekti i Mitrovicës veriore Goran Rakiq.

“Çdo gjë do të bëhet sipas projektit që është definuar që nga vjet e sivjet është verifikuar më tej”, ka thënë Rakiq për gazetën e Beogradit Politika.

Sipas fjalëve të tij, është arritur marrëveshja përfundimtare që muri të ridizajnohet në trajtë shkallësh me ç’gjë është pajtuar edhe Edita Tahiri, transmeton Koha.net

“Biseda është zhvilluar në Prishtinë dhe ajo ka zgjatur disa orë. Çdo gjë është definuar qartë dhe tri palët janë pajtuar që muri të shkurtohet për 90 centimetra dhe të ndërtohen shkallët që do të lidhen me zonën e shëtitores”, ka thënë Rakiq.

Ai ka theksuar se zyrtarë të BE-së dhe autoritetet e Kosovës kanë stopuar vendimin për shembjen e murit dhe kanë marrë vendimin tjetër sipas të cilit ridizajnohet bazamenti.

“Por Prishtina po e pengon krejt marrëveshjen për të akuzuar palën serbe për mosrespektim dhe shtyrje të afateve”, ka thënë Rakiq.

Në pyetjen nëse banorët e Mitrovicës veriore kanë arsye për frikë nga hyrja me dhunë e, siç i quan gazeta serbe, ekstremistëve shqiptarë nga jugu, Rakiq ka thënë se jemi të kujdesshëm.

“E nëse eventualisht ndodhin situata të paparashikueshme, presim që KFOR, EULEX dhe Policia e Kosovës të veprojnë në përputhje me mandatin e besuar”, ka thënë Rakiq.

Lidhur me pyetjen nëse fshati Suhi Doll i takon pjesës jugore apo veriore të qytetit, Rakiq ka thënë se ai fshat është i Mitrovicës veriore me ligj dhe me territor.

“Çështja e këtij fshati ende nuk është mbyllur, e përgjigjen përfundimtare do ta japin ekipet negociuese në njërin nga takimet trepalëshe në Bruksel”, ka thënë Rakiq.