Një autobus përfshihet nga flakët në Turqi, 8 të vdekur

Tetë persona, përfshirë një foshnje 9-muajshe, kanë mbetur të vdekur dhe rreth 33 të tjerë janë lënduar pasi një autobus u përplas dhe më pas u përfshi nga flakët në Turqi.

Aksidenti ka ndodhur të dielën në mëngjes në provincën Denizli, kur autobusi i kompanisë “Pamukkale Tourism” është përplasur me barrierat e autostradës rreth orës 1:40 sipas kohës lokale.

Sipas AP, autobusi po udhëtonte nga Izmiri drejt qytetit bregdetar Antalia dhe në bord ndodheshin 38 pasagjerë dhe tre anëtarë të stafit.

Midis viktimave janë shoferi 50-vjeçar dhe babai i foshnjës, ndërsa autoritetet kanë konfirmuar se numri i të lënduarve është rreth 33 persona.