Ounahi hyn në lojë, Barcelona kërkon zgjidhje më të arritshme se Rodri

Barcelona ka shtuar një tjetër emër në listën e objektivave për përforcimin e repartit të mesfushës, ndërsa vazhdon të kërkojë një lojtar që i përshtatet projektit të saj sportiv.

Bëhet fjalë për mesfushorin maroken Azzedine Ounahi, i cili aktualisht luan te Girona dhe po konsiderohet si alternativa kryesore për objektivin e madh të klubit katalanas, Rodrin. Lajmi është bërë i ditur nga mediumi spanjoll “Sport”.

Sipas raportimeve, Barcelona është në kërkim të një futbollisti me karakteristika të përshtatshme për repartin e mesfushës dhe emri i Ounahit ka dalë në skenë si një opsion mjaft interesant.

Mesfushori maroken vlerësohet për cilësitë e tij teknike, aftësinë në ndërtimin e lojës dhe fleksibilitetin për të luajtur në role të ndryshme në mesfushë, çka e bën një profil tërheqës për skuadrën katalanase.

Barcelona e ka prej kohësh në listën e dëshirave Rodrin e Manchester Cityt, por transferimi i tij konsiderohet një operacion shumë i vështirë për t’u realizuar, kryesisht për shkak të kostos së lartë financiare.

Pikërisht për këtë arsye, drejtuesit e klubit po shqyrtojnë edhe alternativa të tjera dhe Ounahi është një nga emrat që po monitorohet me kujdes.

Mesfushori maroken fitoi vëmendje në arenën ndërkombëtare falë paraqitjeve të shkëlqyera me Kombëtaren e Marokut në Kampionatin Botëror dhe vazhdon të mbetet një lojtar i kërkuar në tregun e transferimeve.

Situata e tij te Girona ka zgjuar interesimin e disa klubeve, ndërsa Barcelona tashmë është futur në garë për të siguruar shërbimet e tij.

Megjithëse Rodri mbetet ëndrra e madhe e Barcelonës për mesfushën, Azzedine Ounahi shihet si alternativa më e arritshme për të përforcuar skuadrën katalanase.