Pas procedimit të mocionit, PDK thërret mbledhje urgjente
-
05/05/2017 | 10:58
Partia Demokratike e Kosovës, sipas burimeve të Gazeta Metro, ka thirrur mbledhje urgjente, pasi pak më parë opozita ka procedurar në Kuvend mocionin e votëbesimit për Qeverinë e Kosovës.
PDK e Kadri Veselit, ka thirrur mbledhje urgjente të Kryesisë së partisë, për në ora 12:00. Kjo ka bërë që mbledhja e Kryesisë së Kuvendit, ku do të caktohet seanca për votëbesimin e Qeverisë, e paraparë fillimisht për orën 13:00, është shtyrë për një orë më vonë.
Opozita ka arritur të mbledh nënshkrimet e nevojshme për votëbesim të Qeverisë, edhe me mbështetjen e deputetëve të PDK’së dhe minoriteteve.
PDK ka kohë që po i kërkon LDK’së shkuarjen në zgjedhje të parakohshme, mirëpo, kjo e fundit është munduar t’i shtyjë ato.
Tani pas mocionit, zgjedhjet e parakohshme duket të jenë të pashmangshme, dhe ato me gjasë do të caktohen për datën 11 qershor. /gazetametro.net
