Pse po rritet çmimi i energjisë në Europë, a ka lidhje gazsjellësi i ri Rusi-Gjermani?

Evropa po përballet me një rritje rekord të çmimeve të energjisë që kërcënon të shkatërrojë rimëkëmbjen ekonomike pas-pandemike, të vështirësojë menaxhimin e të ardhurave në çdo familje si dhe të ndikojë në tranzicionin e gjelbër që po lind.

Një seri faktorësh tregu, gjeografikë dhe politikë janë bashkuar dhe kanë formuar një “stuhi” aspak favorizuese në një kohë kur kemi hyrë në stinën e vjeshtës, temperaturat gradualisht po ulen dhe ngrohja është e domosdoshme.

Analistët kanë paralajmëruar se kriza, e cila është përkeqësuar nga një përzierje e problemeve strukturore, do të zgjasë dhe më e keqja mund të vijnë të tjera.

Çmimet e gazit po rriten gjithnjë e më shumë, në Holandë, nga 16 euro për megavat në fillim të janarit në 75 euro nga mesi shtatorit.

Qytetarët në vende si Spanja, Italia, Franca dhe Polonia tani po përballen me faturat më të larta të energjisë të shënuara ndonjëherë, që shtojnë problemet ekonomike edhe pas pandemisë. Pakënaqësia i ka vënë qeveritë në gatishmëri të lartë, me ministrat që përpiqen të dalin me masa emergjente, edhe nëse ato janë afatshkurtra dhe vetëm pjesërisht efektive për të zbutur ndikimin.

Pse çmimet e energjisë në Evropë po rriten?

Kjo ka ardhur për shkak të rritjes së kërkesës për energji ndërsa jemi duke lehtësuar kufizimet e vendosura nga pandemia e COVID-19, e kombinuar kjo edhe me furnizimin e reduktuar të gazit në tregun global.

Problemet filluan të krijohen në dimër kur temperaturat shumë të ftohta çuan në një kërkesë më të lartë se zakonisht të energjisë për t’u ngrohur .Kjo, nga ana tjetër, shkaktoi një rënie të dukshme të rezervave të gazit, e cila arriti në një nivel shqetësues prej 30% deri në mars.

A ka lidhje midis krizës energjetike të Evropës dhe gazsjellësit të ri Rusi-Gjermani?

Mungesa e habitshme e furnizimeve të reja nga Rusia, e cila është eksportuesi kryesor i gazit në BE, po rrit frikën se Moska dëshiron të përfitojë nga kriza për ta kthyer këtë në favor të Nord Stream. 2. 1,230 kilometra rrugë që kalojnë nën Detin Baltik dhe lidh drejtpërdrejt Rusinë dhe Gjermaninë kanë përfunduar, por nuk ka filluar operacionet për shkak të pengesave burokratike. Projekti është kritikuar rëndë brenda dhe jashtë BE -së për përjetësimin e varësisë së BE nga karburantet fosile dhe shtrirjen e ndikimit gjeopolitik të Presidentit rus, Vladimir Putin.

Qeveria ruse ka mohuar çdo përfshirje në krizën e energjisë, por këmbëngulin se tubacioni duhet të vihet në punë sa më shpejt të jetë e mundur. Kritikët, megjithatë, mendojnë se koha e krizës duket shumë e favorshme për agjendën e Kremlinit.