Qëndroi në duar me trupin në flakë për 47 sekonda: Slloveni hyn në Guinness

Gjimnasti nga Sllovenia, Filip Krzišnik, ka hyrë në librin e rekordeve Guinness pas një performance të pazakontë, gjatë së cilës qëndroi 47 sekonda në duar, ndërsa i gjithë trupi i tij ishte i përfshirë nga flakët.

35-vjeçari e realizoi këtë sfidë në Vjenë të Austrisë, duke vendosur rekordin për qëndrimin më të gjatë në pozicionin e duarve me trupin në flakë. Me këtë paraqitje, Kržišnik u bë personi i parë që e mban këtë rekord.

Pas përfundimit të sfidës, gjimnasti e komentoi me humor performancën e tij.

“Nuk arrita të gjeja një mënyrë më të mirë për t’u ngrohur”, u shpreh me humor Kržišnik për Guinness World Records.

Krzišnik ka një përvojë të gjatë në gjimnastikë, ndërsa është angazhuar edhe si koordinator i skenave të rrezikshme në produksione filmike. Kjo përvojë i ka dhënë atij përgatitjen për të realizuar performanca të tilla të vështira.

Edhe pse arritja e tij ishte 47 sekonda, slloveni kishte synime edhe më të larta për kohën e qëndrimit në këtë pozicion.

“Do të isha i kënaqur edhe me 45 sekonda, por do të ndihesha edhe më mirë nëse do të arrija 60 sekonda”, tha ai.