Qeveria ‘në terr lëshon dorën’: Miraton mbi 5.6 milionë euro transfere në mbledhje elektronike

Qeveria në detyrë ka marrë një varg vendimesh financiare dhe administrative përmes një mbledhjeje elektronike, ku janë miratuar transferime në vlerë të përgjithshme prej 5 milionë e 633 mijë e 900 eurosh, transmeton Gazeta Metro.

Shumica e mjeteve, rreth 4.33 milionë euro, janë ndarë për Shërbimin Spitalor, Klinik dhe Universitar të Kosovës, për sigurimin e barnave nga Lista Esenciale.

Një milion euro të tjera janë transferuar në Ministrinë e Punëve të Brendshme për mbulimin e shpenzimeve operative, ndërsa 300 mijë euro i janë ndarë Komunës së Podujevës për detyrime që rrjedhin nga kontratat.

Në të njëjtën mbledhje është caktuar edhe kompensimi mujor për anëtarët e Bordit të Drejtorëve të Korporatës së Ruajtjes së Energjisë.

Po ashtu, është miratuar përdorimi i një parcele prej 999 metrash katrorë në Prizren, në pronësi të Agjencisë Pyjore të Kosovës, për nevojat e Ministrisë së Drejtësisë. Në fund, Qeveria ka nominuar tre përfaqësues të saj në Këshillin Konsultativ për Komunitete./gazetametro.net