Rakic: Ky s’është mur, është rrethojë e shëtitores
-
09/12/2016 | 13:43
Punimet në murin që po ndërtohet te ura e Ibrit sot janë ndërprerë përkohësisht.
Punëtorët kishin filluar që ta prejnë një pjesë të murit pasi që kishte tejkaluar gjatësinë e paraparë nga dy metra në një metër e 30 centimentra.
Sot te muri në pjesën veriore të qytetit të Mitrovicës kanë shkuar edhe insepktorë të Ministrisë së Mjedisit, me një urdhër për rrënim.
Por kryetari i Mitrovicës së veriut Goran Rakic u ka thënë atyre se muri nuk do të rrënohet pasi që është në kuadër të marrëveshjes.
“E para ky nuk është mur por rrethojë e shëtitores. Pastaj ky ndërtim që po bëjmë nuk është në kuadër të revitalizimit të urës së Ibrit, por në kuadër të ndërtimit të një shëtitoreje”, tha Rakiq.
Ndërkohë punët janë ndalur përkohësisht deri në një vendim tjetër që pritet nga përfaqësues të BE-së në Kosovë. /gazetametro.net
