Reduktimi i 15 pikëve, pronari i Juventusit tregon nëse do ta vendosë klubin në shitje

Pronari i Juventusit, John Elkann këmbëngul se Biankonerët nuk janë në shitje pasi ai nuk dëshiron të braktisë një nga pasionet e gjyshit të tij Gianni Agnelli.

Elkann foli për gazetën financiare franceze Les Echos, duke prekur edhe çështjet e fundit me të cilat përballet Juventusi.

Kushëriri i tij Andrea Agnelli dha dorëheqjen nga posti i presidentit të Biankonerëve në nëntor 2022 dhe gjigantët e Serisë A kanë marrë së fundmi 15 pikë për shkak të parregullsive financiare.

“Andrea mbetet aksioner në zotërimin tonë Giovanni Agnelli BV, ku ai është pjesë e bordit”, tha Elkann, cituar nga Calcio&Finanza.

“Ai bëri një punë të shkëlqyer si President i Juventusit për 10 vjet dhe vendosi të tërhiqej së bashku me bordin e klubit për t’u mbrojtur më mirë nga akuzat që, që nga sot, absolutisht nuk janë provuar.”

Familja Agnelli ka qenë në krye të Juventusit për 100 vjet dhe Elkann nuk është i gatshëm ta shesë klubin. “Është një lidhje e fortë që i rezistoi krizave të ndryshme gjatë ekzistencës së saj,” tha ai.

Kryetari i Stellantis dhe drejtori i Exor theksoi se ai nuk dëshiron të braktisë “një nga pasionet e gjyshit të tij”.

“Unë e kam admiruar gjithmonë guximin e tij,” vazhdoi Elkann.

“Nëse ka një shembull që ai më ka dhënë, është të marr përgjegjësi gjithmonë, edhe në momente të vështira”.

Gianni Agnelli, me nofkën L’Avvocato, është një nga presidentët më ikonë në historinë e Biankonerëve dhe një nga biznesmenët më të shquar italianë.

Vetëm dy ditë më parë, më 24 janar, Juventus bëri nderime për L’Avvocato në 20-vjetorin e vdekjes së tij.