Rrëfimi rrënqethës i të mbijetuarës së vetme nga familja Jashari (Video)

Besarta Jashari, atëherë 10 vjeçe, e mbijetuara e vetme e familjes Jashari, kishte rrëfyer për BBC’në gjithë tmerrin që kishte kaluar në ditën e aksionit të ushtrisë serbe kundër familjes së Adem Jasharit.

Besarta tregohet e fortë, ani pse lotët i ka në sy, teksa rrëfen për gjithë ngjarjen.

“Kemi qenë një familje e lumtur”, thotë Besarta Jashari në dokumentar.

Ajo flet për ndjesinë e tanishme, kur bie të fle, dhe nuk mund t’i heqë nga mendja kujtimet.

Ndërkaq atëbotë, sulmi ndaj familjes Jashari kishte ndodhur në orët e hershme të mëngjesit. Në atë orë në Prekaz sulmi ishte kryer nga Ushtria Jugosllave dhe forcat policore. Forcat sulmuese përbëheshin nga transportues të blinduar dhe pjesëtarë të policisë, të mbështetura nga artileria nga një fabrikë municioni në afërsi. Lagjen Jashari e kishin rrethuar diku me rreth 7-8 mije trupa. Sulmi zgjati tre ditë dhe dy netë.

Forcat policore kishin filluar sulmin pa asnjë paralajmërim. Pas kësaj kishin filluar të shtënat. Nga një shtëpi, policia qëllonte me mortaja, pasuar nga gazi lotësjellës. Shumica e familjes së gjërë e Jasharajve ishin mbledhur në një dhomë të vetme, e cila ishte e murosur me tulla. Një predhë pastaj ra përmes çatisë, duke vrarë një numër të anëtarëve të familjes. Granatimet e vazhdueshme për rreth tridhjetë e gjashtë orë ia mundësuan policisë më në fund të hyjë në shtëpi.

Ndërkohë, organizata “Amnesty International”, në një raport të bërë për rastin, kishte thënë se sulmi kishte për qëllim eliminimin e të gjithë dëshmitarëve. Adem Jashari së bashku me pesëdhjetë e gjashtë anëtarët e familjes së tij u vranë. Gjithsejt pesëdhjetë e tetë persona janë vrarë, në mesin e tyre tetëmbëdhjetë ishin gra dhe dhjetë fëmijë nën moshën gjashtëmbëdhjetë vjeçare.

Shihni rrëfimin e Besartës: